Нема пауза во борбите и бомбардирањата во северна Сирија ниту во петокот, на денот кога на сила требаше да стапи примирјето коешто цела седмица го најавуваат САД и Русија.

Додека војната во Сирија влегува во шестата година, започна во март 2011 година како рефлексија од ткн Арапска пролет“, надежите во постигнување мир се оценуваат како помали од кога и да е, признава и специјалниот претставник на Обединетите нации за Сирија, Стефан де Мистура. Според него, 25-ти февруари е датумот за продолжување на мировните преговори во Женева меѓу владата на сирискиот алавитски (шиитски) претседател Башар ал-Асад и сунитската вооружена опозиција, не е реален.

На теренот курдските сили и натаму напредуваат на северот од земјата, кон сунитските џихадисти од Исламката држава во покраината Хасака, профитирајќи од воздушните удари на меѓународната коалиција предводена од САД, како претходно од руските удари во северната покраина Алепо. Истворемено Турција ги прошири областите на коишто гранатира во Алепо кои се под контрола на сириските Курди, а коишто турската влада ги обвинува за најновиот терористички напад во Анкара, иако тие негираат дека имаат каква и да е врска со тој чин.

„Станува збор за најжестокото бомбардирање од почетокот на турскиот воен поход врз Курдите во оваа област од 13-ти февруари“, го пренесува AFP соопштението на опозициската Сириска опсерваторија за човекови права (SOHR) со седиште во Лондон, која се повикува на информации од активисти на теренот во Сирија.

Главната курдска милиција во Сирија, Единиците за заштита на народот (YPG) и нејзиното политичко крило курдската Партија на демократското единство (PYD), кои контролираат три четвртини од сириско-турската граница, Анкара ги третира како „терористички групи“, поради нивната блискост со забранетата Работничка партија на Курдистан (PKK) чиишто герилци помагаа во одбраната на сирискиот курдски град Кобане пред повеќе од година иполовина од повеќемесечната опсада на Исламската држава. Вашингтон, меѓутоа, ги поддржува Курдите, коишто се покажаа и на сириското и на ирачкото боиште како најефикасните борци против џихадистите.

Во сириската покраина Хасака, Сириските демократски сили (FDS), сојуз во кој е вклучена со арапски локални милиции и YPG, заземаа повеќе места и напредуваат кон градот Шадада, упориште на Исламската држава во оваа покраина, и се наоѓаат на само пет километри од градот.

Во своите напредувања Курдите успеаја да пресечат два важни правци за снабдување на борците на Исламската држава, еден кој ја поврзува Шадада со Мосул во Ирак и еден кој води до Рака, во истоимената сириска покраина, кој е дефакто главен град на „калифатот“ што го прогласи оваа екстремна сунитска организација на териториите коишто ги контролира во Сирија и во соседен Ирак. Курдите, исто така, го заземаа и нафтоносното поле К’биба, североисточно од Шадада.

Во согласност со повикот од 12-ти февруари на Меѓународната група за поддршка на Сирија, којашто обединува 17 земји и три меѓународни организации, меѓу кои се и САД, Русија, Саудиска Арабија и Иран, кои поддржуваат спротиставени страни во сирискиот конфликт, во петокот оружјето требаше да стивне, и да стапи на сила „прекинот на непријателствата“. Кога станува збор за преговорите меѓу владата и опозицијата, кои беа одложени на 3-ти февруари, тие во моментов се замрени.

„Реално гледајќи, не можам да свикам нови преговори во Женева на 25-ти февруари, но ја имаме намерата тоа брзо да го сториме. Ни се потребни десет дена да се подготвиме и да ги испратиме поканите. Преговорите може да бидат крунисани со успех, доколку продолжи доставувањето на хуманитарната помош и доколку дојде до прекин на огнот“, вели претставникот на ОН за Сирија, Стефан де Мисура во интервјуто за шведскиот дневен весник Svenska Dagbladet.

Русија, којашто е сојузник на претседателот Башар ал-Асад, сепак, изрази незадоволство од неговите предлози во врска со желбата повторни да ја контролира цела Сирија.

„Русија сериозно се ангажираше во оваа криза, политички, дипломатски а сега и воено. Оттаму, би сакале Башар ал-Асад да води сметка за тоа“, рече рускиот амбасадор во ОН, Виталиј Чуркин. Во едена од ретките критики на сириските власти, појасни дека изјавите на сирискиот претседател „не се во согласност со дипломатските напори на Русија“ чија цел е прекин на непријателствата и воспоставување примирје.

Оцени, исто така, дека е прерано за евентуално воспоставување зона на забранети летови над Сирија, на што со години инсистира Турција која сега доби поддршка и до Германија. Москва, имено, со поддршка на Кина, неколкупати во Советот за безбедност на ОН пред речиси три години блокираше слични предлог резолуции, бидејќи оцени дека со тоа се повторува ткн Либиско сценарио, која Либија ја доведе до тотален распад и хаос.

Кога станува збор за Турција, пак, НАТО ја предупредил Анкара да не ја предизвикува Русија, како и дека Алијансата нема да дозволи да биде вовлечена во „воена ескалација со Русија“ поради напнатоста меѓу двете земји, откако пред неколку месеци турските ловци соборија руски бомбардер на сириско-турската граница, тврди германскиот магазин Spiegel./крај/мф/сн

Извор: Макфакс