Свет
Лавров: Дамаск почна со исполнувањето на планот на Анан
Сириските власти почнаа со спроведувањето на планот на специјален пратеник на ОН и Арапската лига, Кофи Анан за надминување на кризата во Сирија, изјави рускиот министер за надворешни работи, Сергеј Лавров во вторникот, по разговорите со сирискиот колега Валид Муалем.
„Ние со министерот Муалем (министерот за надворешни работи на Сирија, Валид Муалем, кој е во посета на Москва – з.р.) зборувавме до детали за имплементацијата на планот. Напоменуваме дека ни беше потврдена посветеноста на сириското раководството на сите свои обврски, и информации во однос на ангажираноста на војската и тешкото вооружување во градовите“, рекол на прес-конференцијата во Москва, шефот на руската дипломатија Сергеј Лавров, пренесува РИА Новости.
Планот на специјалниот заеднички претставник на Обединетите нации и на Арапската лига за Сирија, поранешниот генерален секретар на ОН, Кофи Анан, предвидува спроведување од страна на сириската влада и на опозицијата голем број обврски, во прв ред престанок на вооруженото насилство од страна на сите страни под ефективна контрола на специјален механизам на ОН, обезбедување хуманитарна помош за населението во областите зафатени со конфликтот и почнување на политичкиот дијалог во земјата. Предлозите на Анан беа едногласно одобрени од страна на Советот за безбедност на ОН со изјавата на неговиот претседавач од 21-ви март. Во неа беше јасно кажано дека Анан редовно ќе го информира Советот за безбедност за напредокот на неговата мисија.
Истоврмено рускиот министер за надворешни работи истакнал дека Москва нема да го игнорира „добро познатиот факт дека предлозите на Кофи Анан, не беа прифатени од повеќето опозициски групи, вклучувајќи го и Сирискиот национален совет“.
Според Лавров, уште пред почетокот на спроведувањето на планот на Анан, „партнерот на западните земји“ Сирискиот национален совет соопштил дека „овој план нема да успее“.
„Ги повикуваме сите опозициски групи, и сите држави коишто имаат влијание на политичката а особено вооружената опозиција, да влијаат за итен прекин на огнот од сите страни, како што е предвидено со планот на Кофи Анан“, изјавил Лавров.
Лавров потсетил дека шестте предлози на Анан сугерираат „првите чекори што треба да се преземат се повлекување на војската и тешката опрема од градовите, но целосен и одржлив прекин на огнот, според планот на Анан, е можно само со реципрочност, при што сите страни ќе соработуваат со специјалниот пратеник за оваа цел, како и за создавање услови за присуство на теренот на ефективен механизам за мониторинг“.
Во почетокот на април Кофи Анан изјави дека официјален Дамаск ја дал својата согласност за спроведување на неговиот план да започне не подоцна од 10-ти април. Тој исто така, предложи да се бара од завојуваните страни прекин на огнот за рок од 48 часа потоа.
Минатиот четврток, сириските власти го информираа специјалниот пратеник на ОН и на Арапската лига, за делумно повлекување на војската од три сириски града – Идлиб, Забадани и Дера’а. Сепак, официјален Дамаск, во неделата соопшти дека нема да ги повлече своите војски сé додека вооружените групи не дадат писмена гаранција за прекин на огнот. Командата на Слободната сириска војска одби да даде таква гаранција, но изрази подготвеност да престане со борбите на 10-ти април, дури и без повлекување на владините трупи од населените места. /крај/рн/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанските студенти планираат протести против Израел
Студентите во Шпанија во наредните денови би можеле да почнат протести против „геноцидот што го изврши Израел во Палестина“ по примерот на универзитетите во САД, Холандија и Белгија, изјавија нивните претставници за шпанските медиуми.
На Филозофскиот факултет во Валенсија, приморски град на југозападот на земјата, студентите веќе една недела спијат во шатори и секојдневно протестираат.
„Бараме од нашиот универзитет да ги прекине сите врски со институциите и компаниите што соработуваат со Израел“, изјави 20-годишната Естер Монге, студентка по политички науки и социологија за весникот „Ел Паис“.
Во моментот многу универзитети одржуваат состаноци, на кои студентите и професорите гласаат за блокадите на факултетите.
„Студентскиот совет ќе одлучи за активностите во наредните денови“, рече Марија Хозе Лера, координаторка на „Палестиниум“, група за солидарност со палестинските аспирации.
Лера, која има докторат по психологија на Универзитетот во Севилја, вели дека моменно се одржуваат состаноци на универзитетите во Мадрид, Сарагоса, Барселона, Жирона, Гранада и во други градови.
Во понеделникот стотици студенти се собраа пред Универзитетот во Барселона, каде што ги развиорија своите транспаренти.
„Сакаме нашите факултети да ги прекинат сите односи со Израел и компаниите што работат таму“, рече 24-годишниот Пабло Кастиља, дипломиран студент по јавна политика.
Во Мадрид сѐ уште нема протестно кампување, но има демонстрации. На автономниот универзитет во Мадрид планираното предавање за НАТО беше откажано под притисок на пропалестинските демонстранти.
Друг јавен универзитет, Universidad Complutense de Madrid, објави декларација со наслов „Со Палестина против геноцидот во Газа“.
„По влошувањето на насилството врз палестинскиот народ, ги повикуваме професорите, истражувачите и вработените во администрацијата да се спротивстават на колективното казнување на Палестинците што го спроведува Израел“, се вели во декларацијата усвоена од администрацијата на Факултетот за политички науки и социологија.
Сведоци сме на геноцидот врз палестинскиот народ, што е продолжение на децениското систематско насилство врз палестинскиот народ и неговата присилна емиграција“, се вели во декларацијата објавена на веб-страницата на Факултетот.
Свет
Италијанскиот министер за одбрана: Треба да преговараме со Путин
Италијанскиот министер за одбрана, Гидо Крозето, изјави дека санкциите наметнати на Русија не успеале и го повика Западот да направи повеќе за да преговара за дипломатско решение со претседателот Владимир Путин со цел да се стави крај на војната во Украина.
Крозето за весникот „Месаџеро“ изјави дека Западот погрешно верувал дека санкциите може да ја запрат руската агресија и го прецениле неговото економско влијание во светот.
„Наместо тоа, единствениот начин да се реши оваа криза е сите да бидат вклучени, прво да се воспостави примирје, а потоа мир“, рече Крозето. На забелешката на новинарот дека Путин не покажал волја за преговори, министерот за одбрана на Италија одговорил дека „тоа е добра можност да се потрудиме повеќе“.
„Не смееме да пропуштиме ниту еден дипломатски пат, колку и да е тесен“, посочи тој. Тој, сепак, ја бранеше одлуката на Италија да продолжи да испраќа оружје во Украина со цел „да се обезбедат време и услови за постигнување прекин на огнот и мир“.
Министерот исто така предупреди дека во случај Русија да го окупира Киев „тоа неизбежно ќе доведе до конфликт со други земји, кои нема да прифатат руски тенкови да се наоѓаат на нивните граници“.
Тој ја нарече минатогодишната украинска контраофанзива грешка со оглед на воената супериорност на Русија велејќи дека лично го предупредил украинскиот претседател Володимир Зеленски дека е осудена на пропаст, „но тој не го послушал“.
Свет
Би-би-си: Русија можеби регрутира кубански државјани да се борат во Украина
Русија веројатно регрутирала кубански граѓани да се борат во Украина, ги пренесува Би-би-си резултатите од својата истрага.
Според извештаите, Кубанците биле намамени во руската армија со високи плати и пасоши, а во септември и октомври 2023 година на интернет на проукраинската платформа „Информ напалм“ излегоа податоците за пасошите на речиси 200 Кубанци, кои наводно ѝ се приклучиле на руската армија“, пренесува медиумот.
Според написите, документите излегоа на интернет и извештаите во медиумите сугерираат дека на Кубанците им се нудат месечни исплати од речиси 2.000 долари, што е огромна сума за Куба, каде што просечната месечна плата е помала од 25 долари, според Би-би-си. Рускиот пасош овозможува безвизно патување до 117 дестинации, а сопствениците на кубански пасоши се ограничени на 61.