Македонија
Македонија погодена од силно невреме
Силно невреме проследено со пороен дожд, ветар со брзина од 100 км. на час, грмотевици и ретка локална појава на град го погоди вчера попладне
Силно невреме проследено со пороен дожд, ветар со брзина од 100 км. на час, грмотевици и ретка локална појава на град го погоди вчера попладне скопскиот, полошкиот и прилепскиот регион.
Како што за Макфакс информираат од Центарот за управување со кризи(ЦУК), во скопското подрачје брзината на ветрот на моменти достигнала и до 100 километри на час, a наврнале 231 литар/m2 дожд.
Поради обилниот дожд под вода се најдоа повеќе улици низ Скопје, поради што сообраќајот во овие делови на градот беше во прекин.
Дежурните екипи на ЈП Водовод и канализација веднаш интервенирале кај новата клучка кај хотелот Континентал, подвозникот кај Стоковната куќа – Мост, подвозникот кај улица Бихаќка, подвозникот кај населбата Бутел, сообраќајницата кај Момин Поток и главната сообраќајница во населбата Чаир.
Во санирањето на состојбата кај новата клучка во близина на хотелот Континентал биле вклучени четири цистерни и екипи од Бригадата за противпожарна заштита на Градот Скопје. Водата целосно се повлекла од критичните места еден час по полноќ.
Невремето во текот на вчерашниот ден го прекина и првенствениот фудбалски меч меѓу Работнички и Победа, кој во тоа време се играше на Градскиот стадион во Скопје.
Како што информираат од ЦУК, екипата за противградобијна одбрана во Тополчани, вчера во попладневните часови испалила 11 ракети во атарите на селата Болино и Наколец. Поради силниот ветар и лошото време во велешкиот регион забележани се повеќе дефекти во електроенергетската мрежа.
Поради електрични празнења вчера имало поголем број на повремени прекини во снабдувањето со електрична енергија во регионот на Виница, а без струја уште се селата на планината Лисец. Како последица на електрични празнења дошло до прекин во снабдувањето со струја и во селата Дулица и Цера во делчевскиот регион.
Надлежните служби работат на отстранувањето на дефектите и се очекува овие села во текот на денот да добијат струја.
Според податоците од УХМР, и во текот на денешниот ден се очекува да има локална појава на невреме проследена со интензивен дожд, силен ветер, грмежи и град.Температурата на воздухот значително ќе опадне. /крај/цук/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Палевски ќе биде екстрадиран во најкраток можен рок, кажа Тошковски
Министерот за внатрешни работи, Панче Тошковски кажа дека добил информација од Секторот за меѓународна полициска соработка дека е одобрена екстрадицијата за Љупчо Палевски Палчо, со тоа што македонските полициски службеници се во комуникација со турските колеги.
„Се очекува во наредниот период да утврдат се што е потребно од аспект на оперативни активности, за во најкраток можен рок предметното лице кое што е под прогон од страна Обвинителството во Македонија да биде изнесено пред лицето на правдата и пред судот“, рече Тошковски.
Министерот кажа дека нема конкретен рок, но дека тоа ќе биде сторено во најкратко време.
„Очекуваме дека ќе биде за брзо“, додаде Тошковски.
Македонија
(Видео) Пендаровски: Бројот еден е гаранција дека државата ќе продолжи по правилниот курс кон ЕУ
Кандидатот за претседател Стево Пендаровски денеска беше помеѓу граѓаните на општина Арачиново.
Пред присутните, Пендаровски порача дека во досегашниот мандат покажал дека е претседател кој не ги дели граѓаните по ниту една основа и дека така ќе продолжи и во следниот мандат.
„Никогаш не сум бил и не се кандидирам за претседател само на Македонците. Ќе бидам претседател на сите, како што бев глас на секој без оглед на етничка и каква било припадност. Промовирањето и претставувањето на сите граѓани на Македонија ќе биде приоритет и во наредните пет години“ порача Пендаровски.
Пендаровски посочи дека очекува голема поддршка на осми мај за државата да продолжи напред, како демократска, мултиетничка, прогресивна држава на рамноправни граѓани.
„Само бројот еден е гаранција дека Македонија ќе продолжи по правилниот курс кон ЕУ, се друго е продавање на политичка магла и обиди за враќање во времињата на тензии, поделби и неизвесност. Македонија нема друга опција освен продолжување на преговорите за членство во ЕУ додека да станеме дел од големото европско семејство. На 8 мај сите заедно да гласаме за европска Македонија, тоа се гарантира само со заокружување на бројот 1“, посочи Пендаровски.
Македонија
(Видео) Спасовски: Силен СДСМ е потребен за европска иднина, не сакаме враќање на режимот
Носителот на листа на кандидати за пратеници од ИЕ2, предводена од СДСМ и коалицијата, Оливер Спасовски, даде изјава за медиумите во Ѓорче Петров, со повик до граѓаните за масовна излезност на 8 мај за бројот 1.
„Ве повикувам – Излезете на 8 мај, силен СДСМ во Собранието е потребен заради иднината на државата! Да не дозволиме враќање на режимот! Десничарската партија ВМРО ДПМНЕ е истата таа на Груевски, а знаеме сите што значи преголема моќ во нивни раце – крај на ЕУ перспективи, крај на поголеми плати и пензии, крај на можности за младите и крај на соживот и меѓуетничка кохезија“, рече Спасовски.
Притоа, тој истакна дека граѓаните не сакаат враќање на режимот.
„Доволно беше чекањето за Европа и никој не сака враќање назад по патот кон нестабилност и изолација. ДПМНЕ ќе ја одложуваат евроинтеграцијата во недоглед, сега зборуваат за рокови. Истото тоа го правеше и Груевски, тие само ќе продолжат кај што застана тој. Ќе го вратат национализмот, насилството, апсењето новинари и тепањето студенти, прислушувањата и грабежот на народни пари. За тоа да немате дилема!“, рече Спасовски, повикувајќи ги граѓаните да гласаат за СДСМ и коалицијата.
„Сите сме исправени пред голем предизвик, секој еден член и активист на СДСМ, секој граѓанин, Македонци, Албанци, Роми, Срби, Влади, Бошњаци, Турци и сите други – имаме обврска, заради аманетот од предците борците од НОБ и АСНОМ кои ја изградиле Македонија, и уште поважно, заради генерациите кои доаѓаат, да им оставиме европска држава, европски живот дома!
Затоа е важно на 8 мај сите да излеземе и да го поддржиме СДСМ, затоа што ДПМНЕ ќе го донесе повторно режимот кој долго време се трудевме да го срушиме. СДСМ е единствената партија која ја движи државата напред, кон прогрес, интересот на граѓаните и развојот на државата – секогаш пред сѐ и над сѐ.
Мора да сме силни и единствени СДСМ, заради иднината на државата. Да ги зачуваме слободата и напредокот на државата! Нема да се откажеме – Сите масовно на 8 мај гласаме за број 1!“, рече Спасовски.