Претседателот Ѓорге Иванов кој се наоѓа во прва посета на македонските мировници во Авганистан, денеска во Кабул се сретна со највисокиот цивилен претставник на НАТО во таа држава, амбасадорот Марк Седвил и со генералот Дејвид Петреус, командантот на ИСАФ

На средбите е разговарано за постигнувањата и придонесот на македонските војници во мисијата ИСАФ, при што било изразено задоволство од нивната професионалност и посветеност во извршувањето на задачите.Се дискутирало и за придонесот на Република Македонија во ИСАФ, за достигнувањата во процесот на транзиција, напредокот на демократските процеси во Авганистан и градењето на капацитетите на авганистанските безбедносни сили.Посетата претседателот Иванов ја искористи и за средба со македонските мировници. Тој истакна дека Македонија треба да се гордее со учеството на нашите војници во мисијата ИСАФ во Авганистан бидејќи тие на најдобар начин ги претставуваат сите реформи во нашата армија, како и за тоа до каде се подготовките за наше полноправно членство во НАТО.„Иако се уште не сме член на НАТО, тука покажуваме дека ги исполнуваме сите обврски и се однесуваме како и сите земји членки на НАТО“, изјавил претседателот Иванов.Тој потенцира дека македонските војници во оваа мисија придонесуваат и за светскиот мир и за градењето на институциите во Авганистан.„Нашите војници професионално ги извршуваат сите обврски. Почитувани се од колегите, но и од локалното население. Иако сме мала држава, на овој начин придонесуваме да се стабилизира еден дел од светот“, посочил Иванов и додаде оти ова искуство ќе им помогне на нашите војници и за следните мисии.Придонесот на Македонија во мисијата ИСАФ почна во август 2002 г., со симболично испраќање на двајца офицери во рамки на турскиот контингент. Во моментов Република Македонија во ИСАФ учествува со 242 војници, распоредени во четири поголеми контингенти. Досега во оваа мисија учествувале повеќе од 1.500 македонски војници.