Вработените во Министерството за внатрешни работи бараат државата да го реши нивното станбено прашање, како што тоа го направи со вработените во АРМ, со проeктот „АРМ-мој вистински дом“

Македонскиот полициски синдикат и министерството за внатрешни работи спровеле истражување меѓу вработените, кое покажало дека потребата за решавање на нивното станбено прашање е голема и нужна. Ова истражување ќе и го испратат на Владата за да дојдат до некое решение.Истражувањето покажало дека дури 79,9 проценти од вработените имаат потреба од стан, меѓу нив се оние кои немаат воопшто свој стан и живеат под кирија, оние кои живеат во субстандардни услови или со своите родители.„Околу 53.8 проценти од колегите живеат со своите родители, 32 проценти поседуваат стан, а останатите живеат под кирија“ вели претседателот на МПС, Тихомир Климовски.Полицајците имаат потреба за стан од 60 до 80 метри квадратни, 61.3 проценти се спремни со свој сопствен капитал да учествуваат во изградбата на становите, а кредитот како форма за одложено плаќање го преферираат 76 прoценти од вработените.Доколку имa простор за изградба на станови во поранешни касарни, скоро половина од вработените би се согласиле таму да живеат. При евентуална градба на становите за потребите на МВР, солиден број би се согласиле да живеат на периферијата од своите градови.Од синдикатот велат дека со ова државата многу ќе заштеди во смисла на трошоците за транспорт на вработените, но според нив во сето ова поважен е психолошкиот аспект од овој проект.„Покрај економско социјалниот карактер на ова прашање позначаен е психолошкиот. Оној кој што го нема средено живеалиштето, домот, работи со 40 отсто од својот капацитет. Веќе наидуваме и на здравствени проблеми во тој дел, во делот на психолошките проблеми“, вели Климовски.Тие споменаа и примери како ова прашање е решено во другите земји. Во повеќето западноевропски земји се преферира системот на живеење под кирија, но покрај високите плати, постојат и дополнителни механизми кои помагаат вработените да го амортизираат ударот од семејниот буџет кој го предизвикува наемот.„Во Унгарија, Франција и Романија, Полска и Италија во рамките или во близина на полициските станици постојат апартмани во кои бесплатно можат да живеат младите полицајци до нивното стапување во брак, односно максимум пет години“, вели Климовски. И во поранешните југословенски републики се градат државни станови за војската, полицијата и јавната управа, но сепак, според информациите на синдикатот, обемот е мал поради немањето средства и поради неправилности и корупција при нивната распределба.Истражувањето е направено меѓу 5.762 испитаници, вработени во сите организациски целини на Министерството за внатрешни работи.