Американскиот претседател Доналд Трамп денеска изјави дека очекува „многу наскоро“ да потпише договор за украинските резерви на ретки минерали во услови на тековни преговори со Киев.

„Една од работите што ги правиме е многу брзо потпишување на договор за минералите со Украина, што има огромна вредност за ретките земји. И ние го цениме тоа“, рече тој за време на говорот во Белата куќа.

Договорот требаше да биде потпишан кога украинскиот претседател Володимир Зеленски ја посети Белата куќа на 28 февруари, но состанокот пропадна по вербалниот судир со Трамп и потпретседателот Џеј Ди Венс, кои го обвинија украинскиот лидер дека е неблагодарен за долгогодишната американска поддршка.

Трамп рече дека би сакал да види крај на руската војна против Украина, опишувајќи дека тековните преговори напредуваат „прилично добро“, откако имаше одделни телефонски разговори со Зеленски и со рускиот претседател Владимир Путин еден ден претходно.

„Се надеваме дека можеме да спасиме илјадници луѓе неделно од смрт. За тоа се работи. Тие умираат непотребно. И верувам дека ќе го направиме тоа. Ќе видиме што ќе се случи, но верувам дека ќе го направиме тоа“, рече тој.

За време на вчерашниот разговор со Трамп, Зеленски се согласи на ограничен прекин на огнот со Русија што привремено ќе ги запре сите напади врз енергетски цели.

Во заедничкото соопштение на советникот за национална безбедност Мајк Волц и државниот секретар Марко Рубио објавено по завршувањето на повикот се вели само дека енергијата е вклучена во делумниот прекин на огнот и не е јасно дали ги опфаќа истите типови на цели како оние на кои Путин се согласи пред два дена, што претходно беше опишано како забрана за напади „на целата енергетска инфраструктура“.

Израелската полиција употреби воден топ против демонстрантите кои трет ден по ред протестираа против одлуката на премиерот Бенјамин Нетанјаху да го смени шефот на домашната разузнавачка служба Шин Бет Ронен Бар, а неколку демонстранти беа уапсени, пренесоа светските медиуми.

Израелците протестираат и поради одлуката за продолжување на војната во Појасот Газа, со која беше прекршен двомесечниот прекин на огнот, а Хамас се уште држи 59 израелски заложници.

„Многу сме загрижени бидејќи нашата земја се претвора во диктатура“, изјави Ринат Хадаши (59) во Ерусалим. „Тие ги напуштаат нашите заложници, игнорирајќи се што е важно за оваа земја.

Стотици демонстранти денеска отидоа во официјалната резиденција на премиерот, каде се обидоа да ги пробијат безбедносните кордони и се судрија со полицијата. Планирани се и протести пред воениот штаб во Тел Авив.

Дури и пред војната во Појасот Газа, десетици илјади Израелци учествуваа на редовни протести против напорите на владата да ги ограничи овластувањата на судството.

Од почетокот на војната, има редовни протести на семејствата и поддржувачите на заложниците кои ги држеше Хамас.

Хрватскиот премиер Андреј Пленковиќ во четвртокот во Брисел изјави дека разбира оти во Србија се обидуваат да ги бараат проблемите на друго место, но дека не се во меморандумот за соработка во областа на одбраната, кој го потпишаа Хрватска, Косово и Албанија.

„Тоа е меморандум за заедничка соработка, нема непријателски карактер, затоа разбирам дека сега треба да ги бараме проблемите на друго место, но во овој текст ги нема“, рече Пленковиќ запрашан да ја коментира изјавата на српскиот претседател Александар Вучиќ.

Вучиќ во средата изјави дека ова е кршење на т.н субрегионалниот договор за контрола на оружјето од 1996 година и дека е речиси сигурно дека НАТО не бил информиран за тоа. Пленковиќ додаде дека овој меморандум ги помага напорите на Косово и Албанија во нивните реформи и размена на искуства.

Хрватска, Албанија и Косово потпишаа Декларација за зајакнување на одбранбената соработка, по што Србија најави дека ќе побара итно објаснување од министерствата за надворешни работи на Хрватска и Албанија во врска со потпишаниот документ.

„Тие отворија трка во вооружување во нашиот регион, тоа е тешка ситуација за нас, но ја разбравме нивната порака. Ќе ја спасиме нашата земја, ќе ги одвраќаме и секогаш успешно ќе ја браниме од секој потенцијален агресор, дури и од ваков моќен“, им рече Вучиќ на српските новинари по разговорите во НАТО со генералниот секретар Марко Руте.