Македонскиот информативен систем за шумски пожари беше презентиран во среда, а по тој повод, се обрати и министерот за информатичко општество и администрација, Иво Ивановски.

Според него, реализацијата на овој проект, претставува само една од повеќето активности кои во континуитет се преземаат од страна на македонската Влада, со цел зајакнување на капацитетите на националните институции за превенција и справување со шумските пожари.

„Системот се темели на современата информатичка технологија, односно интегрирана и веб базирана ГИС платформа, кој поврзува повеќе институции кои имаат споделена улога во заштитата од шумските пожари. Интегрирани се податоците од УХМР, кои се обезбедуваат од сателитската и приземната мерна мрежа за временските состојби, извршена е целосна инвенторизација на шумите во државна сопственост и воспоставена е ГИС база со потребните податоци за шумите, воспоставена е база со податоци за ресурсите и капацитетите на надлежните институции, како и многу други податоци кои се од интерес за ефикасно менаџирање на ризикот од шумски пожари”, рече Ивановски.

Македонскиот информативен систем за шумски пожари претставува современ Географски информациски систем, кој ќе ја зајакне меѓуинституционалната комуникација, координација и брза размена на податоци. Во голема мера тој ќе придонесе за воспоставувањето на Националната инфраструктура на просторни податоци, за која неодамна беше донесен и предметниот закон.

Системот во јули минатата година беше ставен во почетна оперативна употреба, со додавање на нови карти, нови алатки и функции, со што на корисниците им се обезбедува лесен, брз и разбирлив пристап. /крај/со/мф