Филипинскиот претседател Бенињо Акино нареди ревизија на безбедносниот договор со САД, за да не се повтори случајот со американскиот маринец осуден за силување, кој се спаси од затворската казна, пренесува Reuters

Надлежните служби добиле наредба да ги ревидираат кривичните и законските одредби од Договорот за странски сили, кој и овозможува на армијата на САД да престојува на Филипините за обуки и вежби.Дипломатските односи помеѓу Филипините и САД се затегнаа во 2007 година, откако еден маринец беше осуден за силување на Филипинка, а САД посочија дека, според одредбите на договорот, тој треба да биде под американска јурисдикција, а не во филипински затвор.Тоа поттикна барања од пратениците и активистите на Филипините за прекин на договорот, а срамот на Манила беше уште поголем кога во 2009 година филипинскиот суд ја поништи пресудата и го ослободи маринецот, кој до тогаш беше држен во американската амбасада.„Не сакаме тоа повторно да ни се случи. Затоа, кој и да сте и од каде и да доаѓате, ако извршите злосторство вие сте подложни на законот на таа земја и тука нема исклучоци“, изјави Извршниот секретар на претседателот, Пакито Очоа.Договорот за странски сили беше потпишан во 1998 година, шест години по истекувањето на договорот кој дозволуваше американски бази во земјата, како исклучок на филипинскиот Устав кој забранува странска војска во оваа островска држава.Филипините се еден од најдолготрајните безбедносни партнери на САД, заедно со Јапонија, Јужна Кореја, Сингапур и Австралија.