Место за оптимизам во врска со брзото решавање на спорот за името нема, за што вината ја сносат двете актуелни влади на Македонија и на Грција.

Место за оптимизам во  врска со брзото решавање на спорот за името нема, за што вината ја сносат двете актуелни влади на Македонија и на Грција. Ова го изјави лидерот на Социјалдемократскиот сојуз на Македонија (СДСМ) Бранко Црвенковски во интервју за новиот весник на македонските иселеници од Канада, „Изгреј зора на слободата“. „Не гледам простор за некаков оптимизам. И двете влади наместо да се посветат искрено и со позитивна волја на решавање на спорот, ова прашање го користат за внатрешно политички цели за самоприкажување за големи патриоти. Притоа, треба да бидеме свесни дека цената што ја плаќа Грција е неспоредливо помала од онаа што ја плаќаме ние“, изјави Црвенковски.Тој истакнува дека за него и за СДСМ  прифатливо решение за името би било секое она што нема да се афектира врз идентитетот на Македонците. „За нас клучно прашање е конечното решение да не задира или да не остава простор за оспорување или губење на нашиот национален идентитет. Сметам дека со искрена посветеност можеме да се избориме за такво решение, кое во исто време ќе ни го овозможи интегрирањето во НАТО и Европската Унија“, рече Црвенковски.Лидерот на СДСМ, поранешен премиер и претседател на државата, не смета дека направил грешка што заедно со Глигоров во 1993 се согласиле и донеле одлука за прием на Македонија во ООН под референцата ФИРОМ, потсетувајќи дека тоа биле времиња на војни во опкружувањето и времиња кога Србија на Грција и предлагаше конфедерација и поделба на Македонија. „Да ве потсетам дека тоа е времето кога Милошевиќ јавно му предлагаше на грчкиот премиер Мицотакис конфедерација меѓу Србија и Грција“, изјави Црвенковски во интервју за весникот на Македонците од Канада „Изгреј зора на слободата“. /крај/со/ап/