Македонија
Обезбедувачите со големи овластувања, но многу ниски плати
Новиот Закон за агенциите за обезбедување, кој предвидува обезбедувачите да користат физичка сила, лисици, огнено оружје и дресирано куче, не им дава преголеми овластувања на работниците од приватното обезбедување, уверува министерката за внатрешни работи, Гордана Јанкулоска.
„Во однос на претходниот закон се врши степенување на овластувањата, што значи работниците во приватното обезбедување ќе имаат можност да одберат помеѓу овластувања кои не значат поголемо засегање во слободите и правата на граѓаните што до сега не беше случај. Тоа значи дека им стојат на располагање поширока палета на можности, се со цел да го прилагодат своето постапување на соодветната ситуација односно да реагираат на најнеопходен начин. И не во секоја ситуација мора да се посегне кон употреба на пример на огнено оружје“ вели Јанкулоска.
Според експертската јавност, бројот на оружјето кое што агенциите ќе имаат право да го поседуваат ќе зависи од бројот на вработените, но ќе биде незначително малку и ќе се употребува многу ретко.
„Не држи фамата дека ова се паравојски “ вели професорот на Американ Колеџ и Член на стручниот совет на Комората за обезбедување, Душко Стојановски.
Во последните години зголемен е бројот на приватните агенции за обезбедување, функционираат 163 агенции, но од Комората за обезбедување на лица и имот не знаат со колкав дел во Бруто домашниот производ учествува бизнисот на приватното обезбедување.
Претседателката на Комората, Верица Милеска Стефановска соопшти дека просечната плата на работниците во обезбедувањето, според Централен регистер изнесува 11.212 денари.
Со овој Закон, според Стојановски, посебно се дели техничкото од физичкото обезбедување, посебно се санкционира во законот обезбедувањето на јавни собири, транспортот на пари и една нова можност што порано не функционираше, а тоа е мониторингот на објекти каде што има техничко и физичко обезбедување. Овој Закон ја засилува и контролата на Министерството за внатрешни работи врз работењето на агенциите.
„Праксата покажува дека нема многу прекршувања на овие овластувања. Досега во нашата практика не сме имале прекршувања од типот на употреба на огнено оружје. Обезбедувачите ќе можат да задржуваат само доколку на објектите кои ги обезбедуваат затечат лице кое извршило кривично дело кое се гони по службена должност, а такво овластување има секој граѓанин до доаѓањето на органите за внатрешни работи“ вели Стојановски.
Доколку биде усвоен овој Закон, обезбедувачите ќе можат да вршат проверка на идентитет, предупредување, забрана на влез и неовластено снимање, задржување, преглед на лица, предмети, возила и багаж.Предлог законот им овозможува и да употребуваат средства за присила, физичка сила, гумена палка, средства за врзување на лица, хемиски средства-спреј, огнено оружје и дресирано куче./крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Таравари: ВЛЕН единствена албанска опција на 8ми мај, промената доаѓа
Првиот човек на Алијансата за Албанците Арбен Таравари во презентацијата на изборната програма на ВЛЕН рече дека оваа програма вреди и за луѓето и за програмата.
Таравари истакна дека сегашниот Устав има недостатоци и не ја претставува реалноста во државата. „Убедени сме дека сегашниот Устав има недостатоци, ограничен е и во многу делови не ја претставува денешната политичка, социјална и етничка реалност во државата“, рече Таравари.
Таравари потенцира дека промената е неопходна, додека заедно со промената мора да се смени и Уставот за да почнат преговорите со ЕУ.
“Ќе започнеме голема дебата и ќе изградиме консензус за нов, подемократски и модерен Устав, кој ќе ја редефинира државата како рамноправна држава на две мнозински заедници“, рече Таравари.
На крајот Таравари нагласи дека на 8ми мај на изборите има само една албанска опција а тоа е коалицијата ВЛЕН.
Македонија
Битиќи: Резултатот е нула-нула, a на 8-ми мај заеднички одлучуваме за победникот
„Резултатот е нула-нула, сè уште немаме победник или поразен. Нашата битка за европска Македонија не е завршена. Нашата држава е мала земја, но влогот на 8-ми мај е голем“, порача на денешните средби со жителите на скопската општина Бутел, Фатмир Битиќи, потпретседател на СДСМ и ко-носител на листата на кандидати за пратеници на Коалицијата за европска иднина во Изборна единица 2.
Тој порача дека е опасен патот по кој ВМРО-ДПМНЕ сака да ја води државата, а тоа е кон изолација, кон унгарско сценарио, кон национализми кои разделуваат.
„СДСМ одбива да се движи кон овој правец. Ние имаме програма и визија за европска држава во која владеат дијалогот, инклузивноста, меѓусебното другарство и социјалната правда“, рече Битиќи.
Тој ги потсети граѓаните на 27 април пред седум години, кога се случи упадот во Собранието и обидот за рушење на уставниот поредок по покровителство на ВМРО-ДПМНЕ.
„Слободата која ја добивме по крвавиот 27 април пред седум години, не е луксуз, тоа е можност која ни даде сила да се движиме напред, да стане полноправни членки на НАТО, да ги отвориме портите на Европската Унија. Сега не смееме да дозволиме на 8-ми мај таа да биде украдена, однесена од виорот на национализмот и поделбите. Мораме да продолжиме да го чуваме овој скапоцен подарок кој го добивме во борбата против режимот на ВМРО-ДПМНЕ, бидејќи тој е темелот врз кој се гради праведно и правично општество, “ порача Битиќи.
Македонија
Карапејовски: Сите граѓани треба да имаат слободен пристап до здраствените услуги
Движењето ЗНАМ – за наша Македонија организираше трибина во просториите на Европскиот Универзитет насловена “Борба со остеопорозата со помош на витаминот Д – неговото височество” предводена од проф. Д-р. Јасмин Циривири – кандидат на пратеничката листа а ЗНАМ во изборната единица 1 и прим. Д-р. Маја Панајотовиќ Радевска.
Трибината беше посетена во голем број, каде што граѓаните покажаа голем интерес за активности од овој вид и исто така ја дадоа својата целосна поддршка за ЗНАМ.
На граѓаните им се обрати и носителот на изборната единица 1 од ЗНАМ – Д-р. Бобан Карапејовски, кој посочи “Сите граѓани треба да имаат слободен пристап до здраствените услуги. Пациентите не треба да бидат клиенти и потребно е пациентите да добијат услуги кои што се квалитетни и достоинствени”.
Д-р Циривири во своето излагање презентираше за борбата против остеопоразата, но и напомена дека “На Македонија и се потребни здраствени реформи. Здравството во Македонија е сведено на многу ниско ниво, здраствен систем веќе воопшто и да не постои каде што докторите и пациентите се деградирани.” Тој посочи и дека “Подобро е болеста да се превенира на време, отколку пациентите подоцна да плаќаат огромни суми и да чекаат долго време за нивно лекување.”
На крајот Д-р Циривири и Д-р Панајотовиќ Радевска остварија средба лице во лице со граѓаните, каде што им понудија совети и препораки, но и ги слушнаа нивните проблеми поврзани со македонскиот здраствен систем и услуги.