Американската полиција спасила повеќе од 100 лица, илегални имигранти, за кои се верува дека се држени против нивна волја во едно скривалиште во Тексас.

Во куќата биле пронајдени 94 мажи, 14 жени и две деца кои биле преморени и гладни, но на себе немале траги од потешки повреди, наведува „АФП”.

Меѓу нив имало и една бремена жена која веднаш била однесена во болница на преглед.

„Тоа е типичен пример на трговија со луѓе кога луѓето се третирани како животни наместо како човечки суштества”, изјавил портпаролот на полицијата во Хјустон, Џон Кенон.

Пет лица кои се осомничени за трговија со луѓе се уапсени за време на полициската акција, а федералните агенти за имиграција ги испрашале луѓето пронајдени зад заклучени врати и прозорци во една двособна барака.

Најмалку осум лица од имигрантите се Мексиканци, вклучувајќи и тројца малолетници меѓу нив, соопштило мексиканското Министерство за надворешни работи.

Полицијата го открила скривалиштето откако роднина на жена и две мали деца го пријавила нивното исчезнување.

Кога полициските службеници ја отвориле вратата затекнале огромен број луѓе и непријатен мирис на фекалии, рекол Кенон.

„Условите на бараката во која беа сместени беа страшни. Во куќата немаше вода, а тоалетот делумно работеше. Имаше само една бања за повеќе од 100 луѓе”, додал Кенон./крај/мф/ап