Мнозинството граѓани на Македонија сметаат дека безбедноста во државата е влошена и очекуваат влошување на меѓуетничките односи

Мнозинството граѓани на Македонија сметаат дека безбедноста во државата е влошена и очекуваат влошување на меѓуетничките односи.

Ова го покажа анкетата на Институтот за социјална демократија „Прогрес“, кој работи во состав на НВО “Иницијативи за дијалог и соработка“, спроведена на крајот на мај годинава, на репрезентативен примерок од 1160 испитаници.

Безбедноста е многу влошена за 21,2 отсто од испитаниците, додека 44,6 проценти одговориле дека таа донекаде е влошена. Нема промени во безбедноста за речиси 30 отсто од испитаниците, а само 0,2 проценти сметаат дека безбедносна донекаде е подобрена.

За нарушувањето на безбедноста во државата за 38,9 отсто од испитаниците најодговорна е владата. Една третина од анкетираните не знаат кој е одговорен или немаат одговор, а за останатите тоа се Албанците, меѓународната заедница или некои други фактори.

Речиси 60 отсто од испитаниците сметаат дека меѓуетничките односи ќе се влошуваат, а само 7 проценти очекуваат нивно подобрување. Останатите сметаат дека меѓуетничките односи ќе останат исти или немаат одговор.

Дури 74,5 отсто од анкетираните сметаат дека проектот „Скопје 2014’ негативно се одразува на меѓуетничките односи, а за 17,3 проценти тој проект има позитивно влијание.

Испитаниците во анкетата со оценка од 1 до 10  ја оценуваа работата на владата. Најмногу испитаници – 24,7 отсто на владата и дале единица, средна оценка добила од 16,5 отсто, додека 10 проценти од  анкетираните на Владата и дале најдобра оценка – 10, покажа анкетата на Институтот за социјална демократија „Прогрес“./крај/со/мп