Битолчани се преплашени од информацијата дека  глутница волци е забележана во близина на градот, кај Тумбе кафе, кај Лавци и Буково. Повеќемина граѓани коишто ги забележале волците во близина на населените места, веднаш пријавиле во здружението на ловџии „Сокол“ од Битола.„Во попладневните часови во понеделникот, меѓу 13 и 14 часот организиравме хајка и наидовме на осум волци од кое еден беше ранет, а еден застрелан“, рече Ѓорѓи Бучуковски од битолското Здружение на ловџии „Сокол“.Според Бучуковски, периодот на парење и потрагата по храна ги натерало овие диви животни да слезат од планинските области во населените места„Последниве години, односно од пред две години беше забранет волкот за отстрел, а од 2010 г. повторно е дозволен отстрел бидејќи во изминатиот период нивниот број е драстично зголемен“, вели Бучуковски.Кај Тумбе кафе, каде што битолчани често пешачат, се наоѓа и Зоолошката градина, од каде велат дека се информирани за движењето на глутница волци во близина на зоолошката.„Што се однесува до Зоолошката градина, се надеваме дека во текот на наредните години ќе се подигне соодветна ограда, за да не ни се случи како пред неколку години кога чопор волци нанесе голема штета“, рече директорот на битолската Зоолошка градина, Коста Нешовски.Затекнатите граѓани на овој дел од градот велат дека не ги виделе волците, но оти слушнале дека тие се појавиле во близина на градот/„Слушнав за тоа бидејќи сум секој втор ден на Тумбе кафе. И сега кога се искачив кај Касарната, видов траги од волк, а и пријатели рекреативци пред неколку дена ми кажаа дека ги има тука.“, вели еден битолчанец.Според здружението на ловџии „Сокол“, во текот на зимава застрелани биле неколку волци, од кои примероци се испратени во Министерството за земјоделие, водостопанство и шумарство, со цел испитување колку оваа популација волци е здрава и дали има беснило. Од таму апелираат до граѓаните доколку забележат волк, веднаш тоа да го пријават во здружението./крај/твтера/ом/сн