Папата Франциско, денеска, во своето неделно обраќање ги осуди луѓето што малтретрираат деца и оние што на кој било начин се соучесници во злоупотребата на малолетници.

„Бараме благодат повторно да го откриеме важното место што секое дете го зазема во божјото срце за никој да не биде соучесник во злоупотребите што се вршат врз него, но и жестоко да ги осудиме“, рече папата Франциско, објави АНСА.

Тој рече дека „децата заземаат привилегирано место во божјото срце“ и дека секој што ќе им наштети „ќе мора да одговара за тоа пред Бога“.

Во Солун е потврден првиот случај на човечкиот метапневмовирус (ХМПВ) кај 71-годишен маж, кој е хоспитализиран.

Според грчките медиуми, човекот се заразил од ќерка му, која била во Кина на одмор.

Министерот за здравство Адонис Георгијадис во интервју за грчките медиуми, по објавувањето на првиот случај на метапневмонија во Солун, рече дека повозрасниот маж е хоспитализиран во болница во Солун.

„Се обидуваме да откриеме дали има некаква мутација на вирусот бидејќи има карактеристика лесно да мутира и сакаме да видиме дали има некои поопасни карактеристики“.

„Го чекаме детаљниот преглед, кој го побаравме“, нагласи Адонис Георгијадис.

Тој категорично посочи дека „во овој момент нема особена причина за загриженост за вирусот ниту за Грција ниту за Европа“.

„Метапневмовирусот не е нешто ново, како што беше ковидот во 2019 година кога почна од Кина. Станува збор за познат вирус, кој напаѓа луѓе што со нарушено здравје или мали деца, кои сè уште немаат развиено имунитет“, објасни Георгијадис.

Хади Назари, 23-годишен студент по медицина, беше пронајден жив откога исчезна пред 13 дена, на 26 декември минатата година, додека планинарел во австралискиот национален парк „Кошчиушко“.

Се разделил од своите пријатели за да го фотографира пејзажот, но се изгубил во регионот на Снежните Планини.

Потрагата, во која учествуваа стотици волонтери, меѓу кои и пријателите и семејството на исчезнатиот студент, траеше речиси две недели. Го спасиле група планинари, кои го пронашле денеска во близина на Синото Езеро, на 10-ина километри од кампот, каде што требало да се сретне со своите пријатели.

Според началникот Ендрју Сплит, Назари бил дехидриран, но бил свесен и не бил сериозно повреден. Брзата помош веднаш со хеликоптер го пренела во болница на дополнителен преглед.

Назари преживеал на две житни плочки пронајдени во планинска колиба, бобинки и вода од поток. Сплит ги пофали неговата снаодливост и упорност и истакна дека поминал значително растојание во тешки услови.

Неговото семејство, видно трогнато, рече дека ова е најсреќниот ден во нивниот живот. Спасувачката операција заврши успешно и покрај предизвикувачките временски услови. Полицијата ќе разговара со Назарио кога тој ќе заврши со закрепнувањето во болница за да ги разјасни сите околности на неговото исчезнување.