Тропската бура Ајсак откако предизвика шест смртни случаи на Хаити, во саботата ги зафати источните делови на Куба и е на пат за Флорида, каде треба да се одржи конвенцијата на Републиканската партија на која треба да биде потврдена претседателската кандидатура на Мит Ромни.

По високите бранови долж источниот брег на Куба од крајбрежејто се евакуирани илјадници жители, додека другите се евакуирани од областите крај големите реки поради стравувања од можни поплави. На некои места наврнале и до 200 литри дожд на квадратен метар, а најавени се и нови врнежи. Бурата се движи кон северозападен правец во насока на американската сојузна држава Флорида, каде е прогласена опасност од урагани.

Се предвидува дека под влијание на топлите води во Мексиканскиот залив, бурата Ајсак ќе се претвори во ураган од втора категорија со ветрови со брзина од 160 километри на час, како и дека кон средината на седмицата брегот на САД ќе биде погоден во потегот меѓу Панхандли на Флорида и Њу Орлеанс. Нафтените компании во Мексиканскиот залив пред надоаѓањето на Ајсак ги затвораат своите нафтени и бушотини за гас во морето.

Националниот центар за урагани во Мајами извести дека центарот на бурата во моментов е на 130 километри од североисточниот брег на Куба, како и дека засега се движи со брзина од околу 30 километри на час. Најсилните ветрови се приближуваат на брзини од 100 километри на час, соопшти центарот.

Американските медиуми нагласуваат дека Ајсак ѝ се приближува на Флорида додека Републиканската партија се подготвува да ја одржи таму националната конвенција на којашто Мит Ромни ќе биде и официјално прогласен за претседателски кандидат на оваа партија на изборите што ќе се одржат на 6-ти ноември годинава. Претставници на партијата изјавија дека конвенцијата ќе биде отворена во понеделник, како што е и планирано, но дека веднаш потоа ќе биде одложена до вторникот попладне, за да се гарантира безбедноста на делегатите и другите присутни.

Гувернерот на Флорида, Рик Скот кој во понеделникот требаше да одржи говор на четиридневниот собир на републиканците во Тампа, го откажа учеството на конвенцијата за да се посвети на подготовките за надоаѓањето на бурата Ајсак, а како што најави во своето соопштение, за својата одлука телефонски го известил Мит Ромни. Скот во саботата на Флорида поради доаѓањето на бурата прогласи вонредна состојба./крај/мф/сн