Неизготвена програма за работа, неоснован поврат на ДДВ, незаконско ангажирање стручни лица со договор на дело, ненаплатени надоместоци од прелетувања од авиокомпании, издавање под закуп на неподвижен имот без докази за склучени договори и висина на закупнина.

Неизготвена програма за работа, неоснован поврат на ДДВ, незаконско ангажирање стручни лица со договор на дело, ненаплатени надоместоци од прелетувања од авиокомпании, издавање под закуп на неподвижен имот без докази за склучени договори и висина на закупнина. Ова се дел од неправилностите во работењето на Управата за цивилна воздушна пловидба за 2005 година кои ги регистрира Државниот завод за ревизија, кога на чело беше Илир Мехмеди.

На поранешното раководство на Управата му се забележува дека патувало во странство без претходно да се издадат решенија и патни налози, а директорот Мехмеди заминал на пат во Сингапур, а потоа и во Мадрид заедно со својата сопруга, иако целта на овие две патувања не биле за потребите на УЦВП. За приватните патувања на директорот и неговата сопруга, УЦВП платила над 8.000 евра.

Државниот завод за ревизија констатирал дека Управата за цивилна воздушна пловидба нема програма за работа ниту, пак, доставила финансов план и годишна сметка за 2005 година на разгледување и одобрување пред Владата, што било спротивно на законските одредби. УЦВП како регистриран даночен обврзник плаќал ДДВ на остварениот приход од прелетувања и преглед на авиони, што не се предмет на оданочување, односно не е приход од промет во одредена стопанска дејност што ја обавуваат другите даночни обврзници.

Но, тоа не било пречка Управата, сепак, да изврши неоснован поврат на ДДВ во висина од над 3 милиони евра, наместо тие пари да останат на буџетска сметка. Според констатацијата на Државниот завод за ревизија, во 2005 година УЦВП издвоила околу 700 илјади евра за плаќање лица со договор на работа, иако Владата донела заклучок дека потребните воздухопловни и стручни кадри треба да бидат вработени. Но, хонорарците не добиле статус на редовно вработени, бидејќи Министерството за финансии не одобрило средства за плати во 2005 година.

Државниот завод за ревизија во истрагата за работењето на Управата за цивилна воздушна пловидба дошол до сознанија дека не биле наплатени приходи од прелетувања во висина од 1,3 милиони евра. Ревизијата не добила документи дали и какви мерки за принудно враќање на долгот од странските авиокомпании за прелетувањата над Македонија презема Еуроконтрол во име и за сметка на УЦВП. Според ДРЗ, УЦВП немала изградено систем за контрола на реалните и објективни побарувања на странските авиокомпании по основа на прелетувања, а кои ги извршува Еуроконтрол.

Истовремено, Управата не презела никакви мерки за намирување на долгот од домашниот авиопревозник МАТ за лендинг, АТС и за светлосна сигнализација. По оваа основа, долгот на МАТ кон УЦВП заклучно со крајот на 2005 година изнесува 1,4 милиони евра.

Меѓу должниците на УЦВП се и компанијата „Палер Македонија“, која не постои, потоа „Авиоимпекс“ и „Ер сервис“, но во деловните книги и финансиски извештаи побарувањата се многу помали во споредба со поднесените тужби. Разликата, на пример, на побарувањата од „Палер Македонија“ изнесува дури 1,5 милион некогашни марки или 750 илјади евра.

Како што стои во ревизорскиот извештај, од 2000 па се’ до денес, Управата издавала под закуп неподвижен имот (земјиште и бетонска подлога на локациите на одделни леталишта) и остварувала приход, но на ревизијата не и’ биле понудени докази колку договори се склучени и колкави приходи се остварени. На увид биле дадени само два договора за закуп во времетраење од 5 и 10 години (со „Бониер“ од Куманово и со „Замрзната храна“ од Неготино), при што годишно од нив биле остварени 9.000 евра закупнина, но средствата не се уплатени на буџетска сметка, туку ги искористила Управата за тековни трошоци.

Една од посебните забелешки на Државниот завод за ревизија на работењето на Управата за цивилна воздушна пловидба се и поднесените тужби против Управата во врска со наплата на побарувања за надомест на штета. Најголеми побарувања има МАТ која бара отштета од 40 милиони долари по основа материјална и нематеријална штета и загубена добивка, бидејќи државата не го испочитувала договорот од 2000 година, со кој „Македонски авиотранспорт“ е единствениот и ексклузивен редовен авиопревозник. МАТ поднел тужба, а во 2001 година, за да се избегне паричната штета, министерот за транспорт и врски потпишал анекс-договор со кој му дава на авиопревозникот право да извршува чартер-летови, под услов да ја повлече тужбата. Тужбата не е повлечена, а судот пресудил во корист на МАТ.