Договорот за демаркација на границата меѓу Косово и Македонија не би бил ратификуван без притисок ма меѓународната заедница

Договорот за демаркација на границата меѓу Косово и Македонија не би бил ратификуван без притисок ма меѓународната заедница, пишува денеска печатот во Приштина.

„Собранието два пати се собра за да обезбеди 81 глас за договорот. Иако високите државни претставници оценија дека договорот го отвора патот за дипломатски односи со Македонија, некои пратеници отворено се спротивставија на ратификацијата“, пишува весникот Коха диторе, додавајќи дека без меѓународен притисок договорот не би успеал.

Весникот наведува дека по првиот неуспешен круг на гласање на вонредната седница одржана вчера во Приштина, претседателот на косовското Собрание, Јакуп Красниќи, повторно разговарал со шефовите на парламентарните групи за важноста на договорот.

„Истовремено, претставниците на меѓународните мисии, акредитирани на Косово, имаа низа состаноци со пратениците“, пишува Коха.

Дневникот Косова сот наведува дека договорот „ја задоволува Македонија“.

„Вистина е дека со овој документ Македонија не само што не изгуби територија, туку доби најмалку 2.500 хектари косовска земја, онака како што е и предвидено со договорот што го потпиша со Белград во 2001 година“, коментира Косова сот.

Договорите, како овој со Македонија, поминуваат без врева на Косово и тоа е јасен показател дека во иднина такви договори можат да бидат потпишани со Црна Гора, а можеби и со Србија, шпекулира весникот.

Собранијата на Косово и Македонија вчера го ратификуваа договорот за демаркација на границата, откако претходно договорот го потпишаа премиерите на двете држави.

Претставници од Приштина најавија дека набрзо се очекува и воспоставување дипломатски односи меѓу Косово и Македонија./крај/бе/амп