„Дневник“ – Удавената студентка конечно ќе биде донесена во Македонија, пишува весникот во насловниот текст „Телото на Јана три недели патува од Индија“.

„Дневник“

Удавената студентка конечно ќе биде донесена во Македонија, пишува весникот во насловниот текст „Телото на Јана три недели патува од Индија“. Причина за тринеделното одолговлекување на транспортот од Индија во Македонија, како што наведува весникот во овој текст, била аутопсијата и проверката на крвта, кои покажале дека во телото на удавената 21-годишна студентка Јана Киш немало траги на алкохол. Јана замина во Индија во јули и како студент на размена требало да остане неколку месеци на универзитетот „Манипал“, потсетува весникот.„Нова Македонија“

„Либералкапиталистите ќе ни наметнат евросклероза“ е насловот на текстот во кој весникот го поставува прашањето дали Македонија е подготвена за ураганот „Дабл дип“? Воопшто не е спорно што некој се залага за подинамична и посмела, а и поимагинативна економска игра, анализира весникот, но проблем било да се поверува во кредибилитетот на ороводците. Оти нивното си-ви не е либералкапиталистичко, туку едвај да е пазарно, а единствено е политички-интересовно ориентирано, наведува весникот во својата анализа за капацитетот на земјава да ја претурка претстоечката повторена светска економска криза. „Утрински весник“

Смртта на еден од најпознатите македонски политичари со светски дострели помина незабележано од Скопје, пишува весникот во текстот насловен „Зошто Македонија и Лазар Мојсов си свртија грб?“ Тој, како што наведува весникот, ас на светската дипломатија и дел од некогашната вашингтонска политичка елита, во Македонија бил етикетиран како контроверзна личност и да не објавеле неколку српски медиуми дека е починат и закопан во Алејата на заслужните граѓани во Белград, македонската јавност немаше да ја дознае оваа информација. “Вечер“

„Се одложува стартот на учебната година“ е насловот на текстот во кој весникот известува дека поради високите температури, кои се уште биле присутни во земјава, можно е учебната година да не почне навреме. Тоа го смета градоначалникот на Скопје, Коце Трајановски, кој ги повикува Министерството за образование и општините да размислат за ова. Од ресорното министерство, пренесува весникот, велат дека ја следеле состојбата и ако било потребно, ќе реагирале.