Во текот на посетата на македонскиот премиер Никола Груевски на Саудиска Арабија, во понеделникот на бизнис форумот кој се одржа во соработка со Индустриската комора на Ријад, која ги здружува најголемите корпорации од Саудиска Арабија, беа презентирани можностите за инвестирање во Република Македонија, извести владината служба за односи со јавноста.

Премиерот Груевски истакнал дека Владата е реформски ориентирана и особено пријателски насочена кон развој на бизнисот и инвестициските активности, континуирано спроведувајќи реформи за унапредување на бизнис климата.

„Светската банка ја следи бизнис климата во сите држави во светот, и еднаш годишно го објавуваат извештајот Дуинг бизнис со кој прават рангирање на државите според тоа колку е добра бизнис климата. Македонија е на 30-то место во светот според добрата бизнис клима. Подобро рангирана од 16 земји членки на Европска унија, подобро рангирана од сите држави во Источна Европа и подобро рангирана од земјите од нашиот регион на југоисточна Европа”, истакнал македонскиот премиер, се наведува во соопштението.

Груевски посебно истакнал оти во поглед на даноците, Македонија спаѓа во земјите кои имаат најниски трошоци за правење на бизнис. Премиерот ги информирал саудиските бизнисмени дека воведени се најниски даноци, рамен и низок данок, персоналниот данок и данокот на добивка е 10 отсто, а компаниите кои го реинвестираат профитот имаат данок од 0 проценти, а истовремено намален е данокот на додадена вредност (ДДВ) за повеќе сектори од 18 на 5 отсто.

Истовремено, премиерот Груевски посочил дека се вложува и во образовниот систем. „Англискиот јазик се учи од прво одделение, а втор светски јазик од 6-то одделение. Воведовме задолжително и бесплатно средно образование. Отворивме нови државни универзитети и дисперзирани студии во повеќе градови, школарината е 200 евра. Се преведоа учебници од кои се учи на првите десет универзитети во светот. Отворивме лаборатории за универзитетите кои ги користи и бизнисот. Секој ученик доби компјутер“, информирал Груевски.

Премиерот ги истакнал и поволностите кои се нудат во технолошките индустриски развојни зони. Тој посочи дека секој кој ќе инвестира во зоните во првите десет години не плаќа ниту данок на добивка, ниту персонален данок. За увезените суровини, машини и опрема не се плаќа ниту царина, ниту ДДВ. Земјиштето се дава на закуп по поволна цена. Зоните ја имаат целата потребна инфраструктура.

Вицепремиерот и министер за финансии Зоран Ставрески, пак, во своето излагање посочил дека за позитивното искуство од добрата бизнис клима може да посведочат големите компании кои веќе се присутни на македонскиот пазар и кои веќе работат и инвестираат.

„Во Македонија се присутни компании од Англија, Сад, Белгија, Германија, Русија. Тие се задоволни од третманот и од односот на владините институции, што се вклопува во целиот амбиент на добра бизнис клима на кој работи Владата“, посочил Ставрески.

Министерот без ресор задолжен за привлекување странски инвестиции Висар Фида ги истакнал предностите коишто ги даваат на потенцијалните инвеститори договорите за слободна трговија кои Македонија ги има вклучено. Тој посочи дека Македонија има договор за слободна трговија со сите земји во Европа (без Русија), и на тој начин се надминува хендикепот на мал пазар, и сега постои можност за отворен пазар од 650 милиони потрошувачи.

Менсур Шафи ал-Ајми од Индустриската комора на Ријад изјавил дека кога се работи за бизнис климата и можностите за соработка како индустриска комора постои интерес за зајакнување на партнерството и бизнис врските помеѓу Саудиска Арабија и Република Македонија.

„Трговијата е најсилниот линк на поврзување на две држави кои сакаат да ги зајакнат односите. Постоењето на слободни економски зони, даночни поволности и останатите можности кои се нудат ќе придонесат за јакнење на трговијата и размената меѓу Кралството Саудиска Арабија и Република Македонија”, рекол ал- Ајми.

Владината делегација во текот на вторникот ќе одржи бизнис форум во градот Џеда. кој е втор по големина во Саудиска Арабија и најголем пристанишен град во регионот./крај/мф/сн

Извор: Макфакс