Македонија
Груевски од Мексико побара укинување на визите за македонските граѓани
Премиерот Никола Груевски, кој е во посета на Мексико побарал земјата да ги укине визите за македонските граѓани.
По средбата со претседателот на Мексико кој истовремено е и претседател на Владата, Енрике Пена Нието, Груевски изјави дека Нието бил зачуден што се уште имало визи за македонските граѓани и договориле во наредниот период да започне процедурата за укинување на визите за македонските граѓани откако Македонија ги укина визите за граѓаните на Мексико.
Нието истакнал дека ќе го вложи својот авторитет за овозможување на визна либерализација помеѓу двете земји, како и за регулирање на правната рамка за соработка во економијата.
Средбата на Премиерот на Македонија и Претседателот на Мексико е прва политичка средба на највисоко политичко ниво помеѓу двајца државници од двете земји од стекнувањето на независноста на Македонија.
Соговорниците истакнаа политичка волја за интензивирање на процесот воспоставување на правна рамка за регулирање на односите помеѓу земјите, особено на полето на економијата.
Во таа насока било констатирано дека треба да се започне со процес на подготовка на акти за избегнување на двојното оданочување, за заштита на инвестициите и за овозможување на услови за слободна трговија, за што соговорниците изразија спремност за лично учество во текот на процесот.
Премиерот Груевски ја истакнал интенцијата на нашата земја за градење на продлабочени односи со Мексико во секоја сфера од взаемен интерес. Тој ги презентираше и поволностите кои нашата земја ги овозможува на странските инвеститори и го истакна и економските аспект на посетата на владината делегација.
Во понеделникот Груевски се сретна и со претседателот на Сенатот на Соединетите Мексикански Држави, Ернесто Корадо.
На средбата биле констатирани добрите односи кои владеат помеѓу двете земји и беше изразена подготвеност за нивно понатамошно продлабочување и унапредување.
Соговорниците ја истакнаа својата посветеност за унапредување на меѓусебните односи на полето на економијата, пред се во областа на соработка во инвестициите.
Премиерот Груевски ја предводи владината делегација која е во политичко – економска посета на Мексико, а претходно беше и во Аргентина и Бразил./крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
100 санкционирани возачи во Скопје
Секторот за внатрешни работи Скопје во текот на вчерашниот ден продолжи со контролите во областа на сообраќајот.
„На територија на град Скопје изречени се вкупно 100 мерки, меѓу кои за возење без возачка дозвола 14 санкции, 12 мерки за користење мобилен телефон при возење, пет санкции за некористење сигурносен појас…“, велат од МВР.
Од таму додаваат дека сообраќајните контроли продолжуваат и во наредните денови.
Македонија
„Доколку ДПМНЕ добие преголема моќ ќе се стави крај на европските перспективи, независните медиуми и независното судство“, вели СДСМ
„Потребен е силен СДСМ во Собранието, да не се дозволи повторно инсталација на режим од страна на ДПМНЕ и играње со иднината, стабилноста и безбедноста на државата“, вели СДСМ.
„Доколку десничарска партија како ДПМНЕ добие преголема моќ, извесно е дека ќе се стави крај на европските перспективи, независните медиуми и независното судство.
Тоа ќе значи враќање назад повеќе од 20 години.
Поддршка за СДСМ и обединување на сите прогресивни сили во земјата е единствениот начин да се спречи повторно режим“, соопшти СДСМ.
Македонија
Пендаровски по повод Светскиот ден на слобода на медиумите: Да имаме доблест да ја прифатиме критиката и да ја поддржиме слободата на изразувањето
Претседателот Стево Пендаровски упати порака по повод 3 Мај − Светскиот ден на слобода на медиумите.
„Слободата на медиумите е еден од темелите на демократските вредности и е од суштинско значење за демократскиот развој на македонското општество.
Квалитетните, професионални и независни новинари, коишто ја сфаќаат сериозноста и тежината на креирање на јавното мислење, можат да претставуваат силен глас на јавноста.
Затоа мора да продолжиме да вложуваме во воспоставувањето стандарди со кои медиумите ќе можат слободно и независно да работат и да се развиваат. Да градиме атмосфера во која медиумските работници ќе се чувствуваат безбедно и заштитено. Да имаме доблест да ја прифатиме критиката и да ја поддржиме слободата на изразувањето. Само така ќе имаме моќни и силни медиуми и новинари коишто ќе бидат објективни во известувањето и ќе ѝ служат на јавноста, а не на политичките елити и на изворите на финансирање. На сите медиумски работници им го честитам Светскиот ден на слобода на медиумите“, порача претседателот Пендаровски.