Од Управата за заштита на животната средина велат дека ќе побараат од Европската Унија одложување на рокот до 2018 г. ако РЕК Битола не успее навреме да ги исполни барањата за добивање А еколошки интегрирана дозвола, бидејќи државата ќе стане зависна од странските снабдувачи со струја

Според Законот за животна средина до 2014 г. сите индустриски објекти со поголем капацитет треба да ги исполнат критериумите за најдобри достапни техники. Ако не се почитуваат одредбите од дозволите, Законот предвидува ригорозни казни.„Но ако се утврди дека РЕК објективно не може да го исполни барањето, Владата има право да побара транзиционен период  до 2018 г. РЕК е од круцијална важност за Македонија, со оглед на тоа што снабдува 70 отсто од државата со електрична енергија. Ќе бараме транзиционен период од ЕУ, бидејќи во спротивно тоа би значело затвоање на инсталацијата и би станале зависни од надворешни снабдувачи на електрична енергија“, вели Филип Иванов, директор на Управата.Постројките од енергетскиот сектор за А еколошки интегрирана дозвола требаше да аплицираат во 2007 г., кога и е сторено. Од ЕЛЕМ информираат дека апликацијата била поднесена во ноември 2007 г. и дека се работи на постигнување на бараните стандарди. Од Управата за заштита на животната средина велат дека процесот на издавање на овие дозволи е комплексен затоа што се разгледуваат сите аспекти на работењето на една инсталација, а со доволен број вработени во оваа област располагаат дури од минатата година. „За тоа зборува фактот што пред некоја недела издадовме седум вакви дозволи“, додава Иванов.Издавањето на дозволите е во рамките на Законот за животна средина во кој е вградена Директивата 96/61 на ЕУ.