Новинарот на скопскиот дневен весник Вест, Насер Селмани е новиот претседател на Здружението на новинарите на Македонија (ЗНМ), кој во саботата е избран со мнозинство гласови од колегите на повторното Изборно собрание на ЗНМ

За Насер Селмани во вториот круг од гласањето во саботата гласаа 96 присутни од 143 делегати. Преостанатите гласови отидоа кај неговиот противкандидат Назим Рашиди од Би-Би-Си на македонски јазик. Во првиот круг од гласањето, Селмани доби 95 гласа, додека за Рашиди гласале 37 новинари а 11 ливчиња беа неважечки, што значи дека во вториот круг не успеаја да ги привлечат колегите коишто во првиот круг гласаа за другите четворица кандидати. Имено во првиот круг вкупно гласаа 231 член на Здружението на новинари на Македонија, при што беа неопходни најмалку 116 гласови за да еден кандидат биде избран уште по првиот круг, а гласовите беа распоредени: Жарко Јордановски од Фокус освои 15, Мира Костиќ од Македонско радио 34, Менде Младеновски од Битолски весник седум гласови, а Аљоша Симјаноски од МРТВ 24.„Знам дека е ова огромна одговорност да ве обединам сите и да одиме напред. во ЗНМ повеќе нема реформатори, нема востаници, туку ќе има само новинари“, изјави Селмани непосредно по изборот.Прв победата му ја честиташе неговиот противкандидат Рушиди кој изрази задоволство што е избран претседател на ЗНМ на демократски начин.Ниту ова повторено собрание не мина без скандал, откако уште на почетокот новинарите од три медиума објавија дека се повлекуваат од работата на Собранието. Редакцијата на А1 телевизија се повлече од учество во Изборното собрание на ЗНМ, а повлекувањето го образложи со неодамнешните случувања во телевизијата и полицискиот упад. Како причини за напуштањето тие ги наведоа тоа што некои медиуми инцидентот што пред две недели се случи на „Перо Наков“ бб. го користеле за медиумска пресметка. Учеството на Изборното собрание го откажаа и редакциите на весникот Вечер и телевизија Сител. Како што образложи Марјан Николовски од ТВ Сител кој го пренесе ставот на околу 40-тина новинари на овој и други медиуми кои исто така не учествуваа во гласањето, нивната причина е не реагирањето на ЗНМ поради нападот врз фоторепортерот на Вечер, при негов обид да ги фотографира лидерот на СДСМ и сопственикот на А1 телевизија, кои биле на вечера во еден скопски ресторан. На денешното Собрание кое траеше осум часа, сите кандидати презентирајќи ги своите видувања како треба да функционира ЗНМ, го нагласија достоинството на новинарот и отстранувањето на притисоците, главно, политички.

„Треба да се солидаризираме и да си помагаме меѓусебно, но истовремено ќе мора да ја повлечеме линијата под која не смееме да одиме. Да не дозволиме новинарството да ни биде заложник на мала група луѓе кои заради лични интереси ни го компромитират еснафот“, рече новиот претседателот на ЗНМ, Селмани  на претставувањето на неговата кандидатура, а по објавувањето на резултати од гласањето изјави дека ќе се труди да го дружи разединетиот еснаф и да ги обедини колегите во нивните итнереси.Селмани ја наследи функцијата од досегашниот лидер на ЗНМ Роберт Поповски и асоцијацијата со 458 редовни членови ќе ја води во наредните четири години. На Собранието се гласаше и за другите тела на ЗНМ – Управен одбор, Надзорен одбор и Совет на честа. Денешното Изборно собрание на ЗНМ беше повторено откако на 20 ноември го одложи собранието за избор на нов претседател и органи на управување поради неможноста да се проверат сите нови апликации на пријавените членови на ЗНМ за да се утврди дали тие се новинари и дали имаат право на глас, како и огромната бројка на пријави на нови членови доставени последниот ден пред да се одржи.