Премиерот Никола Груевски се јавил во Министерството за внатрешни работи и лично се заложил веднаш да биде отворена истрага за извозот на нафта во 1998 година за кој „Време“ објави серија написи со докази за незаконитост.

ПО ПИШУВАЊАТА НА „ВРЕМЕ“ ЗА ИЗВОЗ НА НАФТА ВО 1998

Премиерот Никола Груевски се јавил во Министерството за внатрешни работи и лично се заложил веднаш да биде отворена истрага за извозот на нафта во 1998 година за кој „Време“ објави серија написи со докази за незаконитост.

Како што дознаваме од извори во МВР, по написите во „Време“ во кои беа објавени и интерни документи од Царинската управа, Груевски побарал од челните луѓе во Министерството веднаш да отворат истрага и да утврдат каде се парите од извезената нафта и зошто во Народна банка на Македонија не била регистрирана ниту една наплата од извоз на нафта и нафтени деривати, како што пишува во царинската документација што се однесува за периодот од 1 јануари 1997 до 31 декември 1998 година.

„Време“ врз основа на таа документација, за која Царина потврди дека е веродостојна, објави дека во 1998 година од Македонија биле извезувани огромни количества нафта и нафтени деривати во стотици држави во целиот свет. Нафтата била извезува во Кувајт, Саудиска Арабија, Русија, Германија, Франција, Грција, Хрватска, Кина, Белгија, Југославија, Кипар, Италија, Бугарија, Швајцарија, Финска, Велика Британија, Албанија, Литванија, Полска, Унгарија, Обединети Арапски Емирати, Јордан, Бахреин, Молдавија, Данска и во уште многу други. Според официјалните податоци на Царината, во тој период биле извезени 34.027.888 килограми нафта во вредност од 6.727.029 американски долари. Дел бил извезен како моторен бензин, дел како авиобензин, а дел како гориво за млазни мотори од керозински вид.

Овој извоз не бил регистриран во Народна банка, за што и официјално потврдија од кабинетот на гувернерот Петар Гошев. Според официјални извори од Министерството за финансии и од Девизниот инспекторат, секој извоз мора задолжително да се регистрира во НБМ, а во спротивно станува збор за криминал, прекршување на Законот за девизно работење и повлекува строги санкции.

Во прилог на пишувањата на „Време“ одат и изјавите од „Макпетрол“ и од рафинеријата „Окта“, кои демантираат дека воопшто извезле нафта во 1998 година.

Извори на „Време“ од Царинската управа тврдат дека станува збор за фиктивен извоз

на нафта за да се избегнат давачките кон државата, односно за шверц, а потоа истата нафта била препродавана во Македонија, во Србија и на Косово.