Сирискиот претседател Башар ал-Асад во рaзговор за германската телевизија ARD ги обвини САД дека ги поддржуваат бунтовниците во земјата за да ја дестабилизираат Сирија, со што практично заземаат страна во конфликтот, а го фали планот на меѓународниот претставник Кофи Анан.

САД „учествуваат во судирот“, рече сирискиот претседател Башар ал-Асад тврдејќи дека тие „нудат заштита и политичка поддршка на бандите за да ја дестабилизираат Сирија“,

Како што нагласува во интервјуто за ARD претседателот на Сирија, тој нема намера да ја напушти својата функција.

„Претседателот не треба да бега од домашните проблеми, а сега ние се наоѓаме во ситуација на национален предизвик за сириското општество“, вели претседателот Асад додавајќи дека „од друга страна, на должност се останува само со поддршка од народот“.

На состанокот во Женева на 30-ти јуни министрите за надворешни работи на петте постојани членки на Советот за безбедност на ОН, САД, Русија, Кина, Велика Британија и Германија, како и арапските земји од регионот земји и меѓународни организации се договорија за принципите за решавање на ситуацијата во Сирија. Тие вклучуваат формирање преодна влада во земјата, со учество на сите политички субјекти, според новиот план на специјалниот претставник на Обединетите нации и на Арапската лига, Кофи Анан. Сепак, претставници на голем број на западни земји, особено францускиот министер за надворешни работи Лорен Фабиус, по средбата повеќепати изјавија дека договорот постигнат во Женева го исклучува учеството на сирискиот претседател во новата преодна влада.

Во петокот на 6-ти јули групата Пријатели на Сирија, повика за зголемување на притисок врз Сирија и побара оставка од ал-Асад.

Во интервјуто за германската телевизија Башар ал-Асад од критиките не ги поштедува и соседните земји Саудиска Арабија и Катар, коишто според него на „терористите им обезбедуваат оружје“, додека за Турција вели дека им обезбедува логистичка поддршка.

„Знаеме дека мировниот посредник Кофи Анан е соочен со многубројни препреки во спроведувањето на својот план, но тој план не смее да пропадне. Тоа е многу добар план“, вели сирискиот претседател.

Кофи Анан во неделата навечер допатува во сириската престолнина Дамаск и во понеделник ќе се состане со претседателот Асад.

Сирискиот претседател во интервјуто, исто така, тврди дека повеќето од жртвите во конфликот се неговите приврзаници, а не противниците на неговиот режим./крај/мф/сн