Премиерот Никола Груевски и неговиот грчки колега Јоргос Папандреу денеска доцна попладне ќе се сретнат на брегот на Преспанското Езеро од грчка страна и ќе разговараат за спорот околу името

Билатералната средба е дел од мини-самиотот за климатски промени на кој ќе учествуваат премиерите на Грција, Македонија и Албанија. Средбата Груевски – Папандреу во Мала Преспа е втора по ред директна средба по онаа во Брисел на која македонската и грчката страна ќе се обидат директно, надвор од процесот на преговорите што се водат во посредство на ОН и Метју Нимиц, да дојдат до напредок во спорот. Средбите ги иницира Европскта Унија во пресрет на одлуката на Европскиот совет на 7 декември за тоа дали Македонија ќе добие датум за почеток на преговорите за полноправно членство во ЕУ.Се очекува, според дипломатски извори, двајцата премиери пред 7 декември да се сретнат уште еднаш, и тоа во Брисел. Веќе е испланирана, но не и потврдена средбата меѓу претседателот на Европксата комисија Жозе Мануел Баросо и Груевски во Брисел на 2 декември.Двајцата премиери пред средбата во Мала Преспа оценија дека на средбата нема да дојде до решение, но дека тоа е добар знак за напредок во преговорите и конструктивност. Груевски пред Папандреу ќе ги образложи македонските позиции во спорот кои всушност, како што рече тој, се испишани во партиската програма на неговата партија ВМРО-ДПМНЕ. Тоа се неменување на Уставот, прифаќање на решение кое не би задирало во македонскиот идентитет, култура и јазик и кое би било потврдено на референдум, како и двојната формула како решение за опсегот во кој би се употребувало договореното име.Пред денешната средба, државата вчера ненајавено ја посети шведскиот министер за надворешни работи и актулен претседавач на Унијата Карл Билд. Тој доцна синоќа дојде во неформална посета на премиерот Груевски и министерот за надворешни работи Антонио Милошоски. На работната вечера, како што соопштуваат владините прес-служби, на средбата се разговарало за евроинтегративните процеси на државата, но и за прашањето за името наметнато од страна на Грција. Шведскиот шеф на дипломатијата изразил надеж за негово решавање.„Билд изрази задоволство и и’ честиташе на Република Македонија за досегашните успеси во спроведувањето на реформите и модернизацијата на општеството, како и за позитивниот извештај на Европската комисија за напредокот на Македонија“, се наведува во соопштението.