Регион
Одлуката за враќање на Шешељ во Хаг за Белград ‘неморална’ за Загреб “одлична’
Жалбениот совет на Меѓународниот кривичен суд за воени злосторства на територијата на поранешна СФРЈ, обвинетиот за воени злосторства челник на Српска радикална партија (СРС), Воислав Шешељ да биде вратен во притвор, е потег кој официјален Белград го нарече „перфиден“ и „неморален“, додека хрватските власти го карактеризираа како „одлична“ одлука на судот кој ниту требало да го пушта на слобода.
Воислав Шешељ се товари за воени злосторства над Хрватите и Бошњаците во Хрватска, Војводина и во Босна и Херцеговина во периодот од 1991 до 1993 година, по информацијата дека треба да се врати во притворот на Хашкиот трибунал порача дека нема доброволно да му се предаде на судот кој во ноември 2014 година го пушти привремено на слобода поради здравствени причини бидејќи боледува од карцином.
Според одлуката, Шешељ од слобода продолжил со реториката која поттикнува на судири од 1990-те од која српските власти не се оградувале, а хрватските поради тоа бараа да биде вратен во притворот каде што ќе ја дочека пресудата по процесот против него кој траеше 12 години.
На веста дека траба да се врати во притворот, Шешељ го повтори својот став дека нема да се предаде и дека највисоките српски челници, неговите поранешни партиски колеги и најблиски соработници, премиерот Александар Вучиќ и претседателот Томислав Николиќ, ќе мора да го уапсат.
„Да видиме сега како Александар Вучиќ и Томислав Николиќ ќе ме уапсат. Нека дојде полицијата. Таа апси. Доколку дојде жандармеријата, тие тепаат, морам да си го чувам грбот. Нема да биде лесна работа да бидам уапсен“, изјави Шешељ за белградските медиуми и порача дека се наоѓа во седиштето на СРС, а дека во понеделник попладне ќе биде во Бор и ќе зборува на собир на работници. На Twitter, каде што има 11.300 „пријатели“, Шешељ објави „Воопшто не ме интересира одлуката на Жалбениот совет на Хашкиот трибунал. Јас таму сигурно доброволно нема да се вратам“.
Одлуката на Хашкиот трибунал предизвика остри реакции на српските челници, а премиерот Вучиќ, лидер на владејачката Српска напредна партија (СНС), ја оцени како „неморална“ и најави дека неговата влада за неа ќе се изјасни следните неколку дена.
„Не сум во ситуација да ја сокријам лутината на веста поради неморалната одлука којашто ја донеле. Следните денови ќе се изјасниме за тоа“, изјави Вучиќ. Српскиот премиер додаде дека „не мисли оти Шешељ е темата“, додавајќи дека доколку искаже сé што чувствува, некој би помислил дена не успеал да го додржи „гневот поради неморалните одлуки кои некои ги донеле“.
Шефот на српската дипломатија, Ивица Дачиќ, челник на Социјалистичката партија на Србија (СПС), одлуката на Хаг ја карактеризираше како „перфидна и скандалозна“, оценувајќи дека „ја загрозува стабилноста на Србија и на целиот регион“. Кога ќе добие официјално известување, рече Дачиќ, српската влада следните денови ќе се изјасни за чекорите што ќе ги преземе натаму.
Хрватската претседателка Колинда Грабар –Китаровиќ, пак, изјави дека одлуката на Трибуналот за враќање на Шешељ во притвор е најмалку што можело да се стори додека пресудата се очекува со години. „На сите им е јасно дека тој е одговорен за воени злосторства, дека е воен злосторник и оти местото му е во Хаг“, изјави Грабар – Китаровиќ која во јануари испрати писмо во Обединетите нации со мислење дека Шешељ треба повторно да биде затворен.
Министерката за надворешни и европски работи на Хрватска, Весна Пусиќ, споменатата одлука ја смета „одлична“, и во согласност со она што Загреб го барал поради однесувањето на Шешељ откако беше пуштен на слобода. „Им нанесуваше штета на сите, а секако на односите во регионот. Имајќи ги предвид тие факти, тоа е одлична одлука и тоа е она што го баравме од самиот почеток и на што предупредувавме, знаејќи за кого станува збор“, рече Пусиќ.
Одлуката за враќање на Шешељ во притворот, судот ја донел усвојувајќи ја жалбата според којашто челникот на СРС не ги почитувал условите за привременото ослободување и ја попречувал правдата заканувајќи им се на лицата кои соработувале со обвинителството. Апелациониот совет, исто така, наложи веднаш да биде отповикана одлуката за привремена слободата во која не се одредени никакви ограничувања, освен дека не смее да влијае врз сведоците и жртвите, како и дека мора да се врати во Хаг кога судскиот совет ќе го повика назад.
Според оцените, Шешељ ја искористил можноста политички да настапува во Србија, а веднаш по доаѓањето во Белград порача дека нема намера доброволно да се враќа во Хаг. На судскиот совет, исто така, му е наложено откако ќе ги сослуша сите страни „одново да го разгледа прашањето за евентуално повторното пуштање на Шешељ на привремена слобода“./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Земјотрес со јачина од 4,7 степени во Хрватска, почувствуван и во БиХ
Земјотрес со јачина од 4,7 степени според Рихтеровата скала утрово во 05:38 часот е регистриран во Хрватска, објави Европскиот медитерански сеизмолошки центар (ЕМСЦ).
Според информациите од Европскиот медитерански сеизмолошки центар, земјотресот бил на 92 километри јужно од главниот град Загреб и на 14 километри од границата со Босна и Херцеговина, кај Тржачка Раштела.
Земјотресот бил на длабочина од 10 километри.
Земјотресот најмногу бил почувствуван во централна Хрватска и во дел од Босна и Херцеговина со интензитет од V-VI степени според Европската макросеизмичка скала.
Засега нема извештаи за повредени лица или за предизвикана материјална штета.
Регион
На таткото на момчето убиец од Србија му е продолжен притворот за уште 60 дена, има сомнение дека може да го повтори делото
Вишиот суд во Белград му го продолжи притворот за уште 60 дена на Владимир Кечмановиќ, таткото на момчето кое на 3 мај уби девет негови врсници и чувар во ОУ „Владислав Рибникар“.
На Владимир Кецмановиќ му е продолжен притворот поради сомнение дека доколку биде пуштен на слобода за краток временски период ќе го повтори кривичното дело, како и поради тоа што постои основано сомнение дека сторил кривично дело за кое е пропишана затворска казна над десет години, а начинот на извршување и сериозноста на последиците од кривичното дело доведоа до вознемиреност кај јавноста што може да го загрози непреченото и правично водење на кривичната постапка, соопштија од тој суд.
Во обвинението за тешко кривично дело против општата безбедност се товари Владимир К., а за сторено кривично дело недозволено изработување, држење, носење и тргување со оружје и распрскувачки материи, мајката на момчето Миљана К.
Регион
„Мислев дека регалот ќе падне врз мене“ – жена од Србија сведочи за силниот земјотрес
Земјотресот беше многу силен. Кратко, но силно, вели вознемирената Мила Петровиќ од Кладово – место кое утрово го погоди силен земјотрес.
Како што опишува преплашената жена, земјотресот ја исплашил и неа, но и останатите жители на Кладово.
„Мислев дека регалот ќе падне врз мене. Немаше време за бегство никаде. Сè се тресеше многу. За среќа, тоа беше кратко. Кога се смири, сите излегоа на улица“, раскажува таа за Телеграф.рс.
Земјотресот бил со јачина од 4,3 степени според Рихтеровата скала, на длабочина од 11 километри.
Колку бил силен, сведочи и фактот што бил почувствуван во Заечар, Неготин, Доњи Милановац, Бор и други градови на истокот на Србија, а некои граѓани го почувствувале и во Ниш.
„Почувствував земјотрес, се тресеше мебелот во куќата“, „Бев во кревет кога почна тресењето“, напишаа граѓаните.