Зоја Лега-Станоевска, разрешената јавна правобранителка,во 2002 година како судијка во основниот суд Скопје 1, со незаконска одлука оштетила 140 акционери на гевгелиската „Солун 2001“ за околу 3 милиони евра, тврдат акционерите на гевгелиската фирма.

СО НЕЗАКОНСКА ОДЛУКА НА ЗОЈА ЛЕГА-СТАНОЕВСКА

Зоја Лега-Станоевска, разрешената јавна правобранителка,во 2002 година како судијка во основниот суд Скопје 1, со незаконска одлука оштетила 140 акционери на гевгелиската „Солун 2001“ за околу 3 милиони евра, тврдат акционерите на гевгелиската фирма.

Според Ѓоко Калков,претседател и законски застапник на „Солун 2001“, судијката Лега бесправно му овозможила на Ѓорге Дучков, функционер на СДСМ, да стане доминантен сопственик во фирмата незаконски доделувајќи му акциите потребни за доминантниот пакет.

-Одлуката ја донесе на едно судско рочиште и врз основа на усна изјава на генералниот директор на фирмата Борис Поцев, кој на тогашниот претседател на УО, Ѓорге Дучков, му признава сопственост на 6.304 акции. Значи директорот му поклонува акции на претседателот на УО кои се во сопственост на други акционери, а судијката Лега – Станоевска го озаконува тоа со судска одлука – вели Калков.

Калоков нагласува дека станува збор за голем криминал.

-Номиналната вредност е проценета на 528.00 евра, но вистинската вредност на имотот е околу 3 милиони евра. Станува збор за грабеж на акциите на 140 луѓе и тоа врз основа на усно признание. Судијката Лега не ја проверила легитимацијата на Поцев, не проверила дали за преносот на акциите има одлука на Собранието на акционерите. Вџашувачки е тоа што таква одлука има, но фалсификувана. Таа одлука потоа беше криена од Дучков и Поцев како деловна тајна, но во 2004 акционерите ја ископаа истата и ја дадоа на увид во Бирото за вештачење кои се изјасни дека станува збор за фалсификат – вели сегашниот претседател на Управниот одбор на „Солун 2001“.

Акционерите бараат повторување на постапката и враќање на акциите кај вистинските сопственици.

– За утре е закажано судско рочиште на кое треба да се одлучи дали ќе биде повторена постапката за случајот. Се надеваме дека постапката ќе биде повторена и ќе се исправат незаконитостите од првичната судска одлука – вели Калков.

“Солун 2001“ е фирма произлезена од трговско друштво формирано во 1953 година кое во 1990 година целосно се приватизира од страна на вработените, а во 2001 година се поделува на две одделни фирми, „Солун 2001“ и „Солун 53“. Во 2002 година, по одлуката за пренос на акциите во сопственост на Ѓорге Дучков, акционерите почнуваат судски процес со што замира дејноста на фирмата. „Солун 2001“ располага со голем недвижен имот. Поседува царинска продавница на граничниот премин „Богородица“ од 600 метри квадратни и површина од 8.000 метри квадратни. Има два магацини од 1.200 метри квадратни издадени под кирија на 2 фабрики. Располага со земјиште од 10.000 метри квадратни во близина на автопатот и железничката пруга. Во центарот на Гевгелија располага со десетина дуќани, а објекти има уште и во Дојран и во Богданци.