Унгарските власти покренаа кривична постапка против возачот на автобусот полн со македонски државјани, којшто ноќеска излета од патот во близина на Будимпешта.

Како што информираат од МНР, против возачот покрената е кривична постапка поради несовесно предизвикување на несреќа со повеќе повредени. Од МНР не ја соопштуваат причината за несреќата, но како што јавуваат унгарските медиуми, возачот најверојатно заспал.

Еден од патниците во автобусот е во животна опасност, а осум од  патниците се потешко повредени.

Ова се информации кои им ги испратиле унгарските власти на македонското министерство за надворешни работи за здравствената состојба на патниците, македонски државјани, кои беа повредени во несреќата.

Но од МНР велат дека овие податоци за здравствената состојба биле констатирани синоќа кога патниците биле примени во болниците во Татабања и во Ѓер и дека здравствената состојба најверојатно досега е сменета.

Македонскиот амбасадор во Унгарија Дарко Ангелов наскоро се очекува да ги посети патниците сместени во болницата Татабања, каде се наоѓа и критичниот пациент и да го информира министерството каква е неговата здравствена состојба.

Амбасадорот веќе бил во болницата во Ѓер, каде биле сместени патниците кои биле полесно повредени.

Девет од патниците се пуштени од болница и чекаат да им биде организиран превоз за Скопје, а двајца продолжиле за Прага.

Претходно од агенцијата „Тото“ со чиј автобус се превезувале патниците изјавија дека никој од пациентите не е во животна опасност.

МНР  добиле и записник од местото на несреќата и според него, сообраќајката се случила во 1.05 часот на автопатот М1. Автобусот излетал од патот и завршил во ендек во близина на автопатот.

Во автобусот од вкупно 28 патници, 21 биле македонски државјани, четворица биле од Чешка и тројца од Бугарија. /крај/фф