Македонија
Раководството на МО се сретна со синдикатите од областа на одбраната

Намерите и целите на Владата на Република Македонија и на Министерството за одбрана се еднаш и засекогаш да се реши прашањето на професионалните војници, за што добивме поддршка и од соодветните синдикати, порача министерот за одбрана Талат Џафери, по средбата со претставниците на Синдикатот за одбрана и безбедноста и Независниот синдикат на одбраната.
„Заедничка констатација беше дека оваа мерка позитивно ќе влијае на борбената готовност и на квалитетот на извршување на задачите на припадниците на АРМ, имајќи предвид дека во нивниот работен век го имаат решено статусното прашање“, истакнал Џафери по средбата на која синдикатите беа информирани за одлуката на Владата на Република Македонија за пристапување кон измени на Законот за служба во АРМ, со кои професионалните војници по завршување на 45 година ќе бидат трансферирани во други институции во Република Македонија, се до нивното пензионирање.
По состанокот на кој присуствуваа и заменик-министерот за одбрана Емил Димитриев и државниот секретар во Министерството, Сашо Стефаноски, заменик-министерот Димитриев посочи дека станува збор за одлука со две особено важни димензии – општочовечката, односно егзистенцијалната, бидејќи тоа е прв приоритет на секој човек за себе и за своето семејство, како и професионалната димензија која укажува на дополнителниот мотив да се биде уште попрофесионален, поквалитетен и подисциплиниран во работењето.
„Оваа мерка е историска за Министерството и за професионалните војници, сите елементи околу неа се позитивни и нема ризик од некој негативен елемент кој би произлегол од неа“, додаде заменикот министер.
Претставниците на Синдикатот на одбраната и безбедноста и Независниот синдикат на одбраната, изразија благодарност и ја поздравија оваа одлука со која, се согласија, ќе се унапреди професионалноста во Армијата и мотивираноста кај секој вработен да даде сè од себе во извршувањето на поставените задачи./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јаневска: Со буџет од 34 милиони евра, Владата ќе ја поддржи инфраструктурната модернизација на Универзитетот „Мајка Тереза“

Универзитетот „Мајка Тереза“ е нашиот најмлад државен универзитет. Владата е посветена кон обезбедување на ресурси потребни тој и натаму да се развива. Со буџет од 34 милиони евра кои ќе се обезбедуваат етапно, почнувајќи од оваа и во текот на следните пет години, ќе го поддржи градењето на модерен кампус кој ќе биде центар за академска извонредност, за наука и технологија. Студентите и наставниот кадар ќе добијат современи услови за работа и напредување.
Ова го истакна министерката за образование и наука, Весна Јаневска, на денешната церемонија организирана по повод примопредавањето на должноста ректор на оваа високообразовна установа.
Посакувајќи му добредојде на новата функција на проф. д-р Беким Фетаји, министерката Јаневска изрази очекување дека тој ќе продолжи со визијата за уште поголем раст на квалитетот на студиските програми и со својата стручност ќе придонесе универзитетот да се развива како модерна образовна и научна институција, достојна за поддршката што ја добива.
„Очекувам да внесе нова енергија и да ги мотивира универзитетските професори и истражувачи професионално да напредуваат и да ги инспирираат студентите да тежнеат не само за добивање на диплома, туку да станат вистински академски образувани граѓани, подготвени за меѓународно одмерување на знаењата“, рече Јаневска.
Министерката се заблагодари на досегашниот ректор проф. д-р Изет Зеќири, посочувајќи дека како прв човек на универзитетот и како професор, тој дал важен придонес во градењето на академски генерации кои се веќе интегрирани во општествените процеси и функционирањето на државата.
Македонија
Првата детска амбасада во светот „Меѓаши“ одбележува 33 години постоење

Првата детска амбасада во светот – Меѓаши годинава ја одбележува 33-годишната посветеност на заштитата на детските права, постојаната и активната улога во градењето мир и меѓусебно разбирање.
По тој повод, Меѓаши најави промоција на повеќе значајни активности и материјали и тоа нова веб-страница (https://www.childrensembassy.org.mk/pocetna.nspx) и документарен филм: ,,30 години Меѓаши” – Документирано сведоштво за развојот, достигнувањата и влијанието на Меѓаши низ годините“.
Исто така, достапни се уште два кратки видео-прилози поврзани со историјата и работата на организацијата „Како започна приказната на Меѓаши“ и „Како Меѓаши влијаеше на општеството“.
Објавена е и монографија „30 години Меѓаши” – Публикација која ја отсликува историјата на организацијата, активностите и резултатите во изминатите три децении.
„Преку овие промотивни материјали, Детската амбасада Меѓаши не само што го документира своето повеќедецениско активно дејствување, туку и ја засилува својата мисија за поттикнување на одговорноста, едукација и активирање на пошироката јавност во поддршката на децата, воедно потсетувајќи на важноста од мировното образование и градење култура на мирот од најмала возраст“, соопштија од таму.
Македонија
Утре сончево време, следува период на потопло време

Времето утре ќе биде поведро и посвежо, преку денот сончево со мала до умерена локална облачност. Ќе дува слаб до умерен ветер од североисточен правец, информира УХРМ.
Минималната температура ќе биде во интервал од 0 до 8, а максималната ќе достигне од 18 до 25 степени.
Во Скопје, сончево со слаб до умерен ветер од североисточен правец. Минималната температура ќе се спушти до 6, а максималната ќе достигне до 25 степени.
Следува период на сончево и потопло време со мала до умерена облачност и со умерен северен ветер. Утре и во среда утринските температури ќе бидат пониски, а дневните ќе бидат во постепен пораст.