Доне Таневски, најголем поединечен акционер во „Македонијатурист“ и претседател на УО на таа компанија, за 2010 година од дивиденда од своите акции заработил 15,96 милиони денари (околу 259.000 евра)

Доне Таневски, најголем поединечен акционер во „Македонијатурист“ и претседател на УО на таа компанија, за 2010 година од дивиденда од своите акции заработил 15,96 милиони денари (околу 259.000 евра). Со оваа заработка Таневски е акционерот што остварил најголем принос од дивиденда на своите акции, во споредба со сите акционери во 32 друштва кои котираат на двата сегменти на Официјалниот пазар на Македонската берза. Втор на листата акционери со најголем принос од дивиденда е Живко Мукаетов, генерален директор на претседател на УО на „Алкалоид“. Неговата заработка од акциите во „Алкалоид“ во 2010 година изнесува 13,8 милиони денари (над 224.000 евра н.з.). Мукаетов е најголем поединечен акционер во „Алкалоид“ една од најпознатите македонски бизнис брендови во светот. Младиот менаџер најголем дел од своите акции ги наследи од неговиот татко Трајче Мукаетов, долгогодишен директор кој од производите на „Алкалоид“ направи интернационални познати брендови. Живко Мукаетов е единствен и по тоа што со дивиденда купува акции од компанијата која ја раководи. А тоа е манир на менаџер што ги спроведува принципите на корпоративно одговорно однесување. Како што објавивме неодамна Мукаетов најголем дел од својата дивиденда ја вложи во 2.000 акции со право на глас на „Алкалоид“ (околу 8,8 милиони денари). Со тоа дава јасен сигнал на потенцијални инвеститори дека верува во иднината на компанијата со која раководи. Трета на листа е Соња Бибановска, членка на УО на „Македонијатурист“ која за 2010 година добила 11,3 милиони денари за своите 11 отсто акции во најголемата хотелиерска компанија во земјава. На листата се наоѓа уште една жена – Билјана Јованова, втор по големина поединечен акционер во „Алкалоид“. Нејзиниот дивиденден принос за лани изнесува 10,8 милиони денари (околу 175.000 евра). Јованова поседува 5 отсто од акциите со право на глас во „Алкалоид“ , а ги наследи од својот татко Трајче Мукаетов, долгогодишен директор на таа компанија. На листата на акционери со најголем дивиденден принос се наоѓа и Славица Туџарова-Трајковска, најголем поединечен акционер во фармацевтската компанија „Реплек“. Туџарова-Трајковска за лани добила 9,2 милиони денари дивиденда (околу 150.000 евра). Туџарова-Трајковска своите акции (11,6 отсто од главницата на „Реплек“) ги наследи од својот татко Душан Туџаров, претседател на управниот одбор на „Реплек“. По неа, на листата следува нејзиниот брат Иван Туџаров, исто така ги стекна како наследство од својот татко Душан Туџаров. За неговите 11 отсто од „Реплек“ доби 9,1 милиони денари. По нив следува Страшо Милковски, долгогодишен генерален директор на најголемата македонска градежна компанија „Гранит“. Милковски, кој е и претседател на УО на „Гранит“ поседува над 16 отсто од главницата на таа компанија. Неговиот стек во компанијата за 2010 година му носи принос од 4,5 милиони денари (околу 73.000 евра). На осмото место на листата се наоѓа Драган Наков, сопственик на 11,8 отсто од акциите на „Фершпед“ наследени од неговиот татко Штерјо Наков, претседател на УО на „Фершпед“. Наков за лани од своите акции во групата „Фершпед“ доби 4,2 милиони денари (околу 68.000 евра). /крај/пд