Фондот за здравствено осигурување (ФЗОМ) и во 2015 година ќе има рекорден буџет во износ од 24 милијарди денари, во однос на минатата 2014 година зголемен за 1,4 милијарди денари, или 6,4 отсто.

Поради ова, Фондот направи распределба и зголемување на буџетите на јавните здравствени установи во износ од 600 милиони денари (12,2 милијарди во 2014 година, 12,8 милијарди денари во 2015 година.

„Успешниот проект за условните буџети во јавно здравство Фондот продолжува да го реализира и проширува и во 2015 година. Предуслов за проширување на условните буџети се инвестициите во нова инфраструктура, нова опрема, вработувања, обуки, стручни специјализации на медицинскиот кадар во јавното здравство во Република Македонија“, велат до ФЗОМ.

Покрај веќе воспоставените условни годишни буџети во клиниките, во 2015 година Фондот воведува условни буџети за нови здравствени услуги во четири клиники и тоа кај: ТОАРИЛУЦ – операции на сколиози, Клиника за очни болести – крослинкинг, кератотомија, трабекулектомија Клиника за неврохирургија – коилирање на аневризми во мозок, Клиника за кардиологија – нов тип на стентирање за аневрзима на абдоминална аорта (досега само хируршки), Условни буџети за општите и клинички болници за 2015 година

Фондот првпат воведува наменско буџетирање за одредени интервенции и кај општите и клиничките болници. Условните буџети за операции на слепо црево, кила и жолчка во Клиничките и Општите болници надвор од Скопје се однесуваат за здравствени услуги, односно за операции кои спаѓаат во рутински интервенции и секој општ хирург ги изведува. Целта е што поголем број на осигуреници да добијат рутински интервенции во најблиската болницата, а не како досега во Скопје. Со тоа и клиниките во Скопје ќе можат да изведуваат посложени операции.

Досега овие операции 40 отсто се изведувале во Скопје, а 60 проценти надвор од Скопје. Трендот е лош, велат уште од ФЗОМ, бидејќи иако се инвестира во болниците вон Скопје, сепак од година в година, осигурениците за рутински интервенции и понатаму се препраќаат во Скопје. Затоа, Фондот, во договор со општите и клиничките болници, воведе за 2015 година, условни буџети со минимум број на интервенции во секоја болница, за кила, жолчка и слепо црево. Во бројки, тоа значи дека предвидени се околу 1400 дополнителни операции вон Скопје, од кои 300 на слепо црево, 420 на кила и 650 на жолчка. Односно, 1400 осигуреници ќе бидат згрижени во најблиските болници за рутински интервенции.

Со овој стимултивен начин на финансирање на болниците, ќе овозможиме и порамномерна распределба на бројот на извршени операции на сите хирурзи во Македонија и поголемо задоволство на нашите осигуреници.

Овие рутински интервенции во 2014 година, се изведувале во просек 56 операции по хирург вон Скопје, односно, 71 во Скопје. Со овој проект, во 2015 година, планот е во просек по хирург 70 рутински операции да се изведуваат вон Скопје. Ова значи дека во просек секој хирург во општите болници во Македонија ќе треба годишно да изведува дополнително 14 рутински операции.

Директорката на ФЗОМ, Маја Парнаџиева Змејкова, ги истакнува притоа општите болници во Кочани, Струмица и Струга, чии хирурзи во 2014 година оперирале пациенти над просекот, односно 71 операција по хирург годишно, поточно оперирале рутински операции, исто како нивните колеги во Скопје. Смета дека споменатите три болници нема да имаат никаков проблем да ги реализираат предвидените планови.

Овој проект ќе биде предизвик за клиничките болници Битола и Штип, кои ќе треба да направат една третина повеќе операци во однос на 2014 година (980 Битола и 910 Штип). Од општите болници со најголем предизвик ќе се соочат Кавадарци, Охрид и Гостивар, кои треба да изведат приближно 25 отсто поголем број на рутински операции (Кавадарци 350, Охрид 420, Гостивар 630).

Планираните финансирања и предвидените измени, според проекциите на ФЗОМ, ќе обезбеди осигурениците да ја добиваат потребната здравствена услуга, во градот или во најблискиот град каде живеат, хирурзите на клиниките ќе можат да се ослободат од рутински операции и ќе може да изведуваат поголем број на комплексни операции, а граѓаните ќе заштедат пари за пат, и сместување во главниот град./крај/мф/сд

Извор: Макфакс