Бугарија е една од земјите во Европската унија (ЕУ) која е најсилно засегната од безбедноста на снабдувањето со енергија и диверзификација на изворите, а поради тоа бугарската влада активно работи за реализација на клучните проекти, кои ќе и овозможат на земјата да има пристап до сигурен дотур на гас, по конкурентни цени, изјави бугарскиот премиер Бојко Борисов во понеделникот, пренесуваат бугарската агенција „Фокус“.

Говорејќи на отворањето на првата средба на Групата за изградба на гасните врски во централна и југоисточна Европа, Борисов истакнал дека целите на Бугарија се во согласност со оние на Европската енергетска заедница.

„Во зимата 2008-та година, Бугарија беше земјата која најсилно настрада кога Русија ја сопре доставата на гасните резерви за Европа преку Украина. Оттогаш бугарската држава е решена да не дозволи сличен ризик. За бугарската влада, покрај тоа што  приоритет е градењето на интерконекторни врски со нашите соседи во Грција, Романија, Турција и Србија, исто така приоритет претставува и развојот на нашите сопствени наоѓалишта на гас“, додал Борисов, нагласкувајќи дека секој проект треба да биде изграден во согласност со европското законодавство.

Борисов посочил дека поради својата географска положба, Бугарија има потенцијал да биде своевиден дистрибутивен центар на гас за југоисточна Европа и ЕУ.

„Сакам да ве уверам дека бугарската влада, во партнерство со нашите соседи и со поддршка на Европската комисија, е решена да работи за целосна интеграција на гасниот пазар во централна и југоисточна Европа и ние на ова гледаме како на перспектива за поставување на основите на енергетската унија“, порачал Борисов./крај/мф/бс