Програмата “Решенија за Македонија” на СДСМ е само список на желби без идеи за решенија, тврди владејачката ВМРО-ДПМНЕ која вчера направила детална анализа на промените кои во саботата на конгрес ги најави ривалската партија

Од ВМРО-ДПМНЕ утврдиле дека опозициската партија доколку дојде на власт ќе ги зголеми даноците, ќе продаде 49 проценти државен удел во ЕЛЕМ, со што ќе се покачи струјата и ќе отпуштува вработени од државната администрација.„Во програмата на СДСМ стои дека ќе го намалат данокот на добивка на 9%, а оваа Влада на ВМРО-ДПМНЕ веќе го намали овој данок на 0%, освен ако не се подели дивиденда. Ветуваат воведување на прогресивен персонален данок од доход. Но, не велат дека дека ќе го намалат за сиромашните. Тие и понатаму ќе плаќаат исто. Во СДСМ велат дека ќе го довршат автопатот Е-75 со државни пари, а тој автопат веќе се гради со пари на Светската банка. Ветува поддршка на приватниот сектор, а ги зголемува даноците“, констатира Илија Димовски, директор на Центарот за комуникации на ВМРО-ДПМНЕ на денешната прес-конференција.За владејачката партија апсурдно е тоа што СДСМ во својата програма ветува реставрација и обнова на старите цркви и манастири.„Ние не очекувавме СДСМ по којзнае кој пат да ги потцени граѓаните и да ја покаже својата природна ароганција. Тоа што стои во програмата на СДСМ е токму тоа“, ја оценува Димовски програмата на СДСМ.Тој вели дека неговата партија најпосле е среќна што СДСМ најпосле проговори.„СДСМ не може да се крие зад лажните обвинувања и неаргументирани критики. Сега знаеме кои се, што планираат и колку знаат и можат да направат“, вели Димовски.Според владејачката партија СДСМ, доколку сакал да парира на програмата на ВМРО-ДПМНЕ морал да понуди вистински конректни решенија, со конкретни начини на реализација.„За сузбивање на сивата економија имаат напишано само една реченица: дека ќе воведат решенија кои ќе ги мотивираат работодавците да ги пријават дивовработените. Нема ни збор какви се тие решенија“, изјави Димовски на прес-конференцијата.Тој ги отфрли обвинувањата дека партијата стои зад флаерите со кои се исмева СДСМ, а на кои стои модифицираната тупаница и петокрака од логото на СДСМ.„Има ли поголем флаер од тоа што СДСМ ветува зголемување на даноците. Ние немаме потреба да стоиме зад такви флаери“, вели Димовски.