Над 20.000 членови во приватните пензиски фондови ќе бидат шокирани кога деновиве ќе добијат празни извештаи со салдо нула. За нив, во изминативе 6 месеци газдите не платиле пензиски придонес.

НАД 20.000 ЧЛЕНОВИ ОД ПРИВАТНИТЕ ПЕНЗИСКИ ФОНДОВИ ЌЕ ДОБИЈАТ ПРАЗНИ ИЗВЕШТАИ

Над 20.000 членови во приватните пензиски фондови ќе бидат шокирани кога деновиве ќе добијат празни извештаи со салдо нула. За нив, во изминативе 6 месеци газдите не платиле пензиски придонес.

Во приватните пензиски друштва овие лица се регистрирани како вработени кои од јануари до јуни не земале ниту една плата.

Во Новиот пензиски фонд членуваат 53.453 осигуреници, од нив 19% се без платен пензиски придонес. Во КБ Прв пензиски фонд, пак, има вкупно 59.822 осигуреници од кои за 16 отсто не е плаќано цели 6 месеци.

"Сега вработените можат да откријат дали работодавачот за нив плаќал придонес или не. Работникот можеби мисли дека му се плаќа придонес и сега во извештајот да види дека салдото му е нула. Тоа е една од предностите што ги донесе вториот приватен столб", вели Зорица Апостолска, директорка на Агенцијата за супервизија на капитално финансирано пензиско осигурување (МАПАС).

"Кога ќе ги добијат ваквите извештаи овие лица треба да разговараат со работодавачот и да видат каде е проблемот. Има случаи каде тие се одјавени од работа, а работодавачот не им кажал и продолжил да им дава само плата. Тогаш тие треба да го пријават случајот на трудова инспекција. МАПАС нема наделжност", вели Апостолска.

Во приватните фондови велат дека не можат да кажат каде работат лицата за кои не е плаќан придонес, ниту, пак, можат да разграничат дали поголем дел од нив работат во приватниот или во државниот сектор. Тие објаснуваат и дека не можат да направат ништо за овие нивни членови зашто немаат законски механизам.

"Самиот систем е поставен на индивидуален принцип и секој осигуреник потпишал индивидуален договор со друштвото. Ние немаме директен контакт со работодавачите", вели Мира Шекутковска, директор за инвестиции во НПФ.

Во НПФ велат дека можеби некои од овие осигуреници ја изгубиле работата и затоа во изминатиот период не зимале плата.

"Доколку имаат сознанија дека работодавачот плаќал за нив придонес, а во извештајот тоа не е евидентирано, тогаш можеби станува збор за грешка и дека парите залутале некаде меѓу институциите. Фондот на ПИОМ ги распределува парите од пензискиот надоместок и ги дистрибуира до приватните фондови. Но тој процент верувам дека е маргинален", вели Шекутковска. Таа кажува дека осигурениците за кои не е плаќан придонес нема да бидат избришани, без оглед колку долго не се активни.

Извештаите што двете друштва веќе почнаа да ги испраќаат на домашна адреса на осигурениците, содржат информација за висината на пензискиот придонес што за нив го плаќал газдата месец за месец. Во табеларниот приказ стои и вкупната сума , односно колкаво салдо собрале за изминатите месеци и колку вкупно сметководствени единици имаат на нивната сметка.