Собранието по редовната едночасовна пауза вчера ја прекина работата по дневниот ред од 28. седница, а нејзиното продолжение дополнително ќе биде закажано.

Собранието по редовната едночасовна пауза вчера ја прекина работата по дневниот ред од 28. седница, а нејзиното продолжение дополнително ќе биде закажано. Веднаш по почетокот на работата, координаторот на пратеничката група на ВМРО-ДПМНЕ, Силвана Бонева, од името на својата група и на пратеничката група на ДПА побара седницата да биде одложена заради одржување неопходни координации.

Потпретседателот на Собранието, Бесим Догани, го уважи нејзиното барање и ја прекина вчерашната седница на која требаше да продолжи расправата и гласањето за избор на членови на Државната комисија за спречување на корупцијата.

За членови на Антикорупциската комисија во претпладневниот дел од седницата се именувани Иљмир Селами – дипломиран правник кој работи како раководител во оваа комисија, Ариф Муса – претседател на Комисијата за финансирање и буџет на Советот на Тетово и Цветко Мојсовски – раководител на сектор во Управата за јавни приходи.

По паузата, пратениците требаше да ја продолжат расправата и гласањето за другите предложени членови: Зоран Додевски – правник од Куманово, Мирјана Димовска – дипломиран правник и вработена во МРТ, Љубинка Муратовска-Маркова – поранешна судијка во Врховниот суд и Мане Колев – директор на фирмата „Ман-Кол“ од Скопје. Пред почетокот на расправата за членовите на Антикорупциската комисија, Собранието го именува Жарко Денковски за генерален секретар на законодавниот дом.