Голем број на граѓани на Штип денес во организација на Здружението на граѓани почитувачи на делото на Тодор Александров, ја одбележаа 89-годишнината од смртта на овој голем македонски револуционер и некогашен лидер на ВМРО.

Бројни делегации положија цвеќе на спомен плочата која се наоѓа во Ново Село, откако претходно во црквата „Успение на Пресвета Богородица“ се одржа панахида за Александров. За прв пат на Александров му се поклони и Јохан Тарчуловски.

На панихидата и пред спомен плочата се поклонија, министерот за образование и наука, Спиро Ристовски, поранешниот министер за надворешни работи Антонио Милошоски, градоначалникот на Штип Илчо Захариев, претседателот на советот Влатко Миташев, претседателот на ОК на ВМРО-ДПМНЕ Никола Мицевски и други.

„Морам да кажам дека ова ни е 18-та година и сега е многу полесно. Кога ќе се види оваа маса на луѓе, како од година во година има се поголем број на Македонци кои го славата делото на Александров, мило ми е што започнавме со оваа традиција. Не беше лесно, бидејќи во тие времиња имавме многу опструкции. Но мислам дека Александров, како роден штипјанец, човек кој потекнува од Штипско Ново Село, и човек кој ги спроведувал идеалите на ВМРО за слободна и независна Македонија, ја заслужува секоја почит“, изјави Тоше Ристов, еден од првите претставници на ВМРО-ДПМНЕ, кои децении наназад започнаа со одбележувањето на ликот и делото на Тодор Александров.

Делегациите положија цвеќе во знак на спомен, без при тоа да го коментираат присуството на претставници на бугарското ВМРО, кои пред нив беа на спомен плочата на Александров, на покана од ВМРО-Народна партија од Македонија./крај/мф