Со цел да се воведе електронска евиденција за хируршки интервенции, во системот Мој Термин од јули оваа година е воведен нов начин во упатувањето за хируршка интервенција, информираше во вторникот Жаклина Чагороска, член на тимот во Националниот систем за интервенции МојТермин.
 

Со цел да се воведе електронска евиденција за хируршки интервенции, во системот Мој Термин од јули оваа година е воведен нов начин во упатувањето за хируршка интервенција, информираше во вторникот Жаклина Чагороска, член на тимот во Националниот систем за интервенции МојТермин.

„Денеска сме тука со цел да информираме за новината која е воведена во Мој Термин, а се однесува на креирање и управување со електронска листа на чекање за хируршки интервенции во ЈЗУ“, рече Чагороска.

Појасни дека со оваа новина при преглед кај лекарот хирург, доколку е утврдена потреба од хируршка интервенција, се издава упат во кој се наведува типот на операција која треба да биде извршена.

„Со креирање на ваков упат, пациентот автоматски влегува во листа за чекање за таа интервенција. Со тоа во системот ќе се забележат следните податоци: Датум на издавање на упатот/датум на утврдена потреба од хируршка интервенција; Податоци за пациентот; Податоци за типот на хируршка интервенција“, рече претставничката на Националниот систем за интервенции МојТермин.

Во системот Мој термин, како што рече Чагороска, веќе се креирани околу три илјади вакви упати, одредени установи, започнувајќи од јули, на овој начин веќе ги креираат упатите за операција. Според тие податоци ЈЗУ УК за Пластична и реконструктивна хирургија има 866, ЈЗУ УК за Очни болести – 678, Градска општа болница 8-ми Септември -219 и ЈЗУ УК за Детска хирургија – 213 упати.

„Тоа што го сметаме за една од предностите на системот е дека доколку пациентот веќе се наоѓа на листа за чекање во одредена установа за одредена хируршка интервенција, за него не може да се издаде нов упат сé додека не се избрише стариот, односно пациентот може да биде само на една листа за чекање за одредена хируршка интервенција“, појасни Чагорска.

Во вториот чекор процесот продолжува со дефинирање на терминот за операција. Согласно член 39-а од Законот за здравствена заштита според кој „Здравствениот работник кој врши хируршки интервенции во здравствените установи … самиот го определува терминот за хируршката интервенција во договор со пациентот“.

Според условите во секоја установа, како што толкуваше, се креира планот за оперативна програма. Во зависност од патологијата која ја работат клиниките, овој план се креира за различен период, некаде за една недела однапред, некаде постои можност да се креира за еден месец, а можно е да се креира и за еден до два дена однапред (таму каде што се работи со ургентна патологија), дополни Чагороска.

Додаде дека принципот кој се применува во системот е „прв дојден – прв услужен“. За секое „прескокнување на ред“ лекарот задолжително пополнува образец во кој ја наведува причината, и истиот го потврдува со својот потпис и факсимил. Оваа причина се внесува и во електронскиот систем.

Системот нуди можности за сите активности кои се предвидени при креирање на плановите за оперативна програма. Така, доколку се јави потреба некој пациент да биде „избришан“ од листата на чекање, тоа може да се направи во системот, но притоа задолжително од страна на операторот треба да се наведе причината зошто пациентот ќе биде избришан. Сево ова ќе треба да биде потврдено и во образец потпишан од страна на лекарот.

Исто така, пациентите задолжително ќе бидат контактирани по телефон, на телефонскиот број кој го оставиле при прегледот кај лекарот и кој се наоѓа на упатот кој им е издаден. Откако пациентот ќе влезе во оперативната програма, доколку се појави потреба, тој може да биде и вратен во листата на чекање, односно терминот за операција да биде поместен. Ова може да се случи од неколку причини, но, обврска на установата е да ја заврши предвидената операција во најбрз можен рок.

Чагороска информираше дека изминатите неколку денови била извршена обука на вработените во установите кои вршат хируршки интервенции, за користење на оваа новина во системот Мој Термин.

Дополнително, до овие установи се испратени насоки по кои треба веднаш да се постапи. Така, на пример, за секоја хируршка интервенција која ќе биде извршена во установата задолжително треба да биде креиран електронски упат со користење на опцијата за креирање на Болнички упат- операција. Упатот се креира при специјалистички преглед кај докторот, во моментот кога е утврдена потребата од хируршка интервенција. (Исклучок се ургентните операции, за кои административниот дел се завршува подоцна)

Натаму, сите пациенти кои чекаат да бидат повикани за одредена хируршка интервенција, а кои се внесени во некој список (хартиен или електронски), да бидат задолжително внесени во електронските листи на хируршки интервенции преку креирање на електронски упат за операција. Доколку е потребно, а посебно во случаи кога се работи за списоци на пациенти кои чекаат подолг период (повеќе од 1 (еден) месец), пациентите да бидат задолжително контактирани по телефон и повикани на преглед кај докторот кој треба да ја изврши интервенцијата. Целта на овој преглед е да се потврди или отфрли потребата од хируршка интервенција. Доколку е потврдена потребата од хируршка интервенција, да се креира болнички упат за операција, со што пациентот ќе биде внесен во листата на чекање за соодветната интервенција. Ова се однесува и на пациентите кои имале закажано хируршка интервенција од страна на доктори кои повеќе не се во работен однос во установата. За овие пациенти да се направи соодветно прераспределување кај други доктори.

Исто така, треба да се започне веднаш со примена на електронските листи за хируршки интервенции, односно со креирање на распоред за оперативна програма.

При креирање на листите и распоредот за оперативна програма задолжително од страна на докторите да се применуваат обрасците кои се во прилог (Откажување на упат за хируршка интервенција и Прескокнување на редослед за хируршка интервенција). Имено, за секоја промена од овој тип, докторот задолжително со својот потпис и факсимил на приложените обрасци ја потврдува причината за промена, за секој пациент поединечно.

За контрола на креирање и управување со листите на закажани интервенции е надлежен Државниот санитарен и здравствен инспекторат. Инспекторите ќе имаат увид во електронските листи, согласно нивните надлежности, и на терен ќе вршат контрола на правилната примена на системот./крај/мф/сд

Извор: Макфакс