Над 55 милиони евра од ИПА фондовите на Европската унија (ЕУ) ставени и се на располагање на Република Македонија

Одлуката за пренос на надлежностите на Македонија за управување со ИПА фондовите за IV компонента – развој на човечки ресурси ја донела вчера европската комисија.Веста пред македонската јавност ја објави вицепремиерот задолжен за евроинтеграции, Васко Наумовски појаснувајќи дека се работи за средства наменети за проекти во областа на вработувањето, социјалата и образованието.„Угледот на Македонија кај нашите пријатели од ЕУ и натаму расте за што доказ е и укажаната доверба за управување на парите со европските даночни обврзници“, изјави Наумовски.Тој појасни дека користењето на средствата од програмата за развој на човечки ресурси е подготовка на земјата за целосно вклучување во проектите на европскиот социјален фонд.„По препораката за отворање на преговори со ЕУ ова е уште една јасна порака дека ЕУ смета на Македонија како сериозен партнер и идна членка на европското семејство“, рече Наумовски.Министерот за образование и наука, Никола Тодоров најави дека дел од средствата ќе бидат наменети за три проекти од областа на образованието.За модернизација на двегодишните и тригодишните средни училиште ќе бидат одвоени 2.860.000 милиони евра, информираше Тодоров.Тој посочи дека 1.148.000 евра од европските средства ќе бидат одвоени за подобрување на образованието на етничките групи со посебен акцент на Ромите.Средства во висина од 1.728.000 евра ќе бидат обезбедени за зајакнување на образованието кај возрасната популација.Решавање на проблемот на невработеноста, особено на социјално ранливите групи, ќе биде приоритет во користењето на средствата на ИПА фондовите од страна на Министерството за труд и социјална политика.Владата изрази надеж дека ќе има целосна соработка со невладиниот сектор и социјалните партнери во распределба на овие средства.