Министерот за здравство Бујар Османи го поддржа донесувањето Декларација за европска соработка во областа на електронското здравство, соопштија од министерството за здравство

Министерот за здравство ја предводеше македонската делегација на Конференцијата на ЕУ на високо ниво „Е-здравје 2010“, што се одржа во Барселона  Шпанија.На министерската конференција беше усвоена Декларација за европска соработка во Е-здравјето со која се потврдуваат политичките и стратешки заложби на ЕУ за употребата на Е-здравјето, како инструмент за постигнување здравствени цели и приоритети на европско и на национално ниво, како и за градење доверба кон и прифаќање на стандарди  за Е-здравје.Османи се обрати на министерската конференција и го поддржа донесувањето на Декларацијата информирајќи дека во Македонија се во тек два големи проекта за воспоставување систем на електронска здравствена картичка и воспоставување интегриран здравствен информатички систем.Османи нагласи дека Република Македонија го следи современиот тек на развој и примена на Е-здравјето за унапредување на националниот здравствен систем, во полза на пациентите и на професионалните здравствени работници.Министрите за здравство на земјите-членки на ЕУ повикаа на координација во областите каде Е-здравјето има влијание врз здравјето на населението,  на синергија со областите на конкурентност, истражување и регионален развој и користењето на инструментите на информатичката технологија во здравството во корист на пациентите, здравствените системи и општеството.Во продолжение на Конференцијата се организираше настанот, посветен на информатичката технологија во светот на здравјето на кој учествуваа повеќе од 2.500 експерти и корисници на ИТ во здравството ширум светот.Рамка за активностите на Е-здравјето претставува Стратегијата на ЕУ 2020 и Европската дигитална агенда, а министерската конференција на ЕУ е претходница на Светската конференција за информатички компјутерски технологии.