Македонија
„Зелените“ не прифаќаат ново вештачење за Велес
Зелената коалиција не прифаќа да се прави повторно вештачење на почвата на територијата на општина Велес оти смета дека досегашните вештачења,студии и анализи за загаденоста се доволни судот да донесе конечна одлука по тужбата против државата
Екологистите одбиваат да платат 50 илјади евра, што Технолошко-металуршкиот факултет од Скопје ги побара за вештачење на почвата по барање на судот. „Ние како тужители сметаме дека имаме релевантни докази со коишто можеме да докажеме дека состојбата со загадувањето на Велес е катастрофална. Доколку правобранителството не ги признава тие докази, тогаш може да плати некоја релевантна институција да го направи вештачењето. За нас студијата што е добитник на државна награда „Гоце Делчев“ за наука пред две години е релевантен доказ за тоа што се случуваше и се’ уште се случува во Велес“, рече др. Ненад Коциќ. „Зелената коалиција со консензус донесе одлука на 28 април да не прифаќа дополнително вештачење чиишто пари повторно ќе одат за четири- пет докторанти кои ќе докторираат на велешката мака“, рече Игор Смилев од Зелена коалиција. Екологистите сметаат дека нема потреба да се изложуваат на дополнителни трошоци бидејќи последната анализа на почвата во велешкиот Градски парк, што е направена во септември минатата година ја потврдува загаденоста со олово, цинк и кадмиум, кои ги надминуваат критичните граници. „Доколку судот донесе одлука во наша полза, ќе бидеме задоволни оти државата ќе биде судски принудена да ги спроведе оние барања што ги имаме наведено во тужбата, а бараме нешто многу логично, санирање на состојбата. Во спротивно правдата ќе ја бараме пред меѓународните судови, рече Коциќ. За велешките екологисти 50 илјади евра се безобразно многу пари. Според нив, вештачењето можело да се направи за трипати помала сума. Велат и дека факултетот ја доставило сметката, иако се’ уште не биле утврдени границите на парцелите кои биле предмет на вештачење.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Таравари: ВЛЕН единствена албанска опција на 8ми мај, промената доаѓа
Првиот човек на Алијансата за Албанците Арбен Таравари во презентацијата на изборната програма на ВЛЕН рече дека оваа програма вреди и за луѓето и за програмата.
Таравари истакна дека сегашниот Устав има недостатоци и не ја претставува реалноста во државата. „Убедени сме дека сегашниот Устав има недостатоци, ограничен е и во многу делови не ја претставува денешната политичка, социјална и етничка реалност во државата“, рече Таравари.
Таравари потенцира дека промената е неопходна, додека заедно со промената мора да се смени и Уставот за да почнат преговорите со ЕУ.
“Ќе започнеме голема дебата и ќе изградиме консензус за нов, подемократски и модерен Устав, кој ќе ја редефинира државата како рамноправна држава на две мнозински заедници“, рече Таравари.
На крајот Таравари нагласи дека на 8ми мај на изборите има само една албанска опција а тоа е коалицијата ВЛЕН.
Македонија
Битиќи: Резултатот е нула-нула, a на 8-ми мај заеднички одлучуваме за победникот
„Резултатот е нула-нула, сè уште немаме победник или поразен. Нашата битка за европска Македонија не е завршена. Нашата држава е мала земја, но влогот на 8-ми мај е голем“, порача на денешните средби со жителите на скопската општина Бутел, Фатмир Битиќи, потпретседател на СДСМ и ко-носител на листата на кандидати за пратеници на Коалицијата за европска иднина во Изборна единица 2.
Тој порача дека е опасен патот по кој ВМРО-ДПМНЕ сака да ја води државата, а тоа е кон изолација, кон унгарско сценарио, кон национализми кои разделуваат.
„СДСМ одбива да се движи кон овој правец. Ние имаме програма и визија за европска држава во која владеат дијалогот, инклузивноста, меѓусебното другарство и социјалната правда“, рече Битиќи.
Тој ги потсети граѓаните на 27 април пред седум години, кога се случи упадот во Собранието и обидот за рушење на уставниот поредок по покровителство на ВМРО-ДПМНЕ.
„Слободата која ја добивме по крвавиот 27 април пред седум години, не е луксуз, тоа е можност која ни даде сила да се движиме напред, да стане полноправни членки на НАТО, да ги отвориме портите на Европската Унија. Сега не смееме да дозволиме на 8-ми мај таа да биде украдена, однесена од виорот на национализмот и поделбите. Мораме да продолжиме да го чуваме овој скапоцен подарок кој го добивме во борбата против режимот на ВМРО-ДПМНЕ, бидејќи тој е темелот врз кој се гради праведно и правично општество, “ порача Битиќи.
Македонија
Карапејовски: Сите граѓани треба да имаат слободен пристап до здраствените услуги
Движењето ЗНАМ – за наша Македонија организираше трибина во просториите на Европскиот Универзитет насловена “Борба со остеопорозата со помош на витаминот Д – неговото височество” предводена од проф. Д-р. Јасмин Циривири – кандидат на пратеничката листа а ЗНАМ во изборната единица 1 и прим. Д-р. Маја Панајотовиќ Радевска.
Трибината беше посетена во голем број, каде што граѓаните покажаа голем интерес за активности од овој вид и исто така ја дадоа својата целосна поддршка за ЗНАМ.
На граѓаните им се обрати и носителот на изборната единица 1 од ЗНАМ – Д-р. Бобан Карапејовски, кој посочи “Сите граѓани треба да имаат слободен пристап до здраствените услуги. Пациентите не треба да бидат клиенти и потребно е пациентите да добијат услуги кои што се квалитетни и достоинствени”.
Д-р Циривири во своето излагање презентираше за борбата против остеопоразата, но и напомена дека “На Македонија и се потребни здраствени реформи. Здравството во Македонија е сведено на многу ниско ниво, здраствен систем веќе воопшто и да не постои каде што докторите и пациентите се деградирани.” Тој посочи и дека “Подобро е болеста да се превенира на време, отколку пациентите подоцна да плаќаат огромни суми и да чекаат долго време за нивно лекување.”
На крајот Д-р Циривири и Д-р Панајотовиќ Радевска остварија средба лице во лице со граѓаните, каде што им понудија совети и препораки, но и ги слушнаа нивните проблеми поврзани со македонскиот здраствен систем и услуги.