Спелеонуркачкиот клуб Врело и викендов ќе продоли со чистење на дното на Мавровско Езеро од рибарски мрежи во кои се заплеткани мртви риби, како и од конзерви, лименки, шишиња и други отпадоци, за да се заштитни рибниот фонд, пред се’ пастрмката и раковите карактеристични за ова езеро

Чистењето на Маровското Езеро, иако се паднати и надворешните температури како и температурата на водата, се спроведува во овој период бидејќи наскоро почнува мрестот на пастрмката. Тоа значи дека доколку чистењето беше преземено претходно, во летните месеци, повторно ќе се натрупаа остатоци од рибарски мрежи кои се опасни за мрестот бидејќи подмладокот на пастрмките може да остане заплеткан во нив.Акцијата почна минатиот викенд, со чистење на просторот од браната кај селото Леуново кон селото Маврово, а потоа и кон новата црква „Св. Никола“. Утре, како што соопштуваат од спелеонуркачки клуб „Врело“ чистењето ќе се одвива од црквата кон браната, а за недела е планирано да се опфати просторот кон Маврови Анови, а идниот викенд ќе се чисти и останатиот простор.За поефикасно извршување на работите, покрај нуркачите, ангажирани се и два моторни чамца, со кои до брегот се превезува отпадот што се вади од езерото. Поради намалениот водостој просечна длабочина на езерото сега е околу 28 метри.Членовите на клубот „Врело“, кои како дел од Меѓународната експедиција летово ја истражуваа подводната пештера Врело на Матка, во оваа акција за прв пат ја испробуваат и новата опрема  која, по истражувањето на подводната пештера Врело, им беше донирана од Градот Скопје и од јавното претпријатие „Јасен“. Со средствата добиени од Градот Скопје се набавени два подводни рачни компјутера, два респиратора и подводна камера, а  „Јасен“ донираше и два комплета нуркачка опрема.Соработката меѓу Министерството за заштита на животната средина и просторно планирање, кое го финансира проектот, и спелеонуркачкиот клуб „Врело“, според најавите, ќе продолжи и идната година, за кога се планира тие да бидат ангажирани за чистење и на други водни потенцијали во земјава, а како следен чекор, како што се најавува, ќе биде чистењето на реката Радика и нејзините притоки.