Невработеноста е еден од најголемите проблеми на Македонија, и нејзиното намалување треба да биде највисок приоритет на македонската Влада

Невработеноста е еден од најголемите проблеми на Македонија, и нејзиното намалување треба да биде највисок приоритет на македонската Влада во процесот на евроинтеграции.

Ова денеска во Скопје го изјави евроамбасадорот во Македонија Ерван Фуере во врска со проектот поддржан од ЕУ, “Отворен дијалог за социјална вклученост преку вработување на младите и нивните работнички права во Македонија“.

“Невработеноста кај младите е еден од главните проблеми со кои што се соочува Македонија, што за жал, може да се зголемува, како што се продлабочува финансиската криза“, додаде евроамбасадорот.

Според Фуере, цел на Владата во евроинтеграциите треба да бидат намалување на пречките за создавање на работни места, јакнење на деловно опкружување, владеење на правото и примена на правилата, без политичко влијание врз бизнисот.

“Владата треба да биде што е можно посеопфатна и да ги вклучи сите чинители во донесување на одлуки, најмногу врз основа на консензус и дијалог“, изјави Фуере.

Проектот, што ќе трае до 2011 година, ќе го спроведува Балканската фондација за деца и млади, со соработка со Сојузот на синдикатите на Македонија (ССМ), техничка експертиза од Универзитетот во Љубљана и финансиска поддршка од ЕУ.

Ова е прв проект финансиран од европските Програми на заедницата за напредок, а ќе се прошири и во другите балкански држави – Косово, Србија, БиХ и Хрватска.

“Треба да се надмине јазот меѓу власта и младите. Младите не знаат како да ги бранат своите права“, изјави директорот на Фондацијата Јоргос Пападакис, кој на почетокот од собирот говореше на разбирлив македонски јазик.

Според него, ова претставува “пионерски проект“ не само за Македонија туку и за целиот регион, а ќе опфати семинари, јавни панели, студиски посети и публикации.

Претседателот на ССМ Ванчо Муратовски преку бројки ја претстави ситуацијата на младите во македонското општество.

“Во Македонија има состојба на висока невработеност или над 50 проценти од младата популација се без работа, а процентот е постојано во пораст“, изјави Муратовски, и додаде дека времето на чекање на вработување, во просек, е четири и повеќе години.

“Потенцијалот на младите не се користи, а тие се една од најранливите групи на пазарот на трудот и најмногу изложени на ризикот од сиромаштија“, вели Муратовски.

Според податоците од 2003 година 30 насто од невработените во Македонија се во старосната група од 15 до 24 години./крај/ис