Нова демократија на Имер Селмани формира нова опозициска пратеничка група во Собранието, која нема да се приклучи на опозицискиот блок на Бранко Црвенковски, лидерот на СДСМ

Во пратеничката група на Нова демократија се најдоа Абедин Зимбери, Бесим Догани и Сулејман Рушити, а последна се приклучи и пратеничката Флора Кадриу, која ќе биде и координатор на групата. Кадриу претходно беше член на Демократската партија на Албанците. Имер Селмани, лидерот на НД, најави дека Нова демократија ќе продолжи да биде конструктивна опозициска партија и оти ќе го критикува секој потег на владата или на мнозинството, што ќе се судри со визијата или со интересите на граѓаните. Според Селмани, Нова Демократија ќе понуди конкретни решенија за проблемите и за другите политички процеси. “Ќе продолжиме да бидеме гласноговорник на народот во Парламентот, да ги артикулираме сите потреби, да понудиме решение. Нашата визија е многу јасна – европска Македонија интегрирана во НАТО и во ЕУ, развиена Македонија која нуди перспектива за сите граѓани“, изјави денеска Селмани во Собранието. Претседателот на НД, кој на последните избори за претседател собра повеќе од 150 илјади гласови, вели дека не преговата со Никола Груевски, претседателот на ВМРО-ДПМНЕ и премиер, за влез во Владата. “Не преговараме, ниту сме преговарале за влез во Владата. Ние сме премногу заинтересирани Нова демократија да стане легитимно голема политичка партија, засега опозициска, да ги артикулира интересите на граѓаните“, вели Селмани. Иако Селмани ја гледа Нова демократија како опозициска партија, сепак најавува дека новата партија нема да стане дел од опозицискиот блок што го формира Бранко Црвенковски, претседателот на СДСМ. Лидерот Селмани вели дека членството на партијата секојдневно се зголемува, а дефинитивниот број ќе го знаат кон крајот на јули, откако ќе заврши неговата обиколка на општинските организации и местата каде што освои најмногу гласови на последните избори.