Македонија
Државата не е пред банкрот
Средствата за исплата на пензиите се веќе префрлени, со што сите пензионери ќе можат во текот на денот да си ги подигнат парите, додека исплатата на социјалната помош беше комплетирана во понеделник.
Средствата за исплата на пензиите се веќе префрлени, со што сите пензионери ќе можат во текот на денот да си ги подигнат парите, додека исплатата на социјалната помош беше комплетирана во понеделник.
Ова беше соопштено во вторник на заедничката прес-конференција на министерството за финансии и на министерството за труд и социјална политика, на која беа демантирани гласините дека државата се наоѓа пред банкрот.
„На првиот работен ден од месецот исплативме средства во износ од 94 милиони денари (1,55 милиони евра), за социјална помош за лицата што користат туѓа нега, а веќе денеска се исплаќаат пензиите изјави министерот за финансии Зоран Ставрески..
Мораме да ги разочараме сите оние кои излегоа на насловните страни со некои други дезинформации. Пензиите се исплаќаат денеска и во текот на денот ќе бидат пренесени на трансакционите сметки на пензионерите“, додаде Ставрески.
Тој рече дека нема да биде малициозен и да излезе со оценка дека некоја фирма е пред банкрот, ако се уште не ги исплатила платите, како што одредени медиуми вчера констатираа за државата.
„Буџетот се наоѓа во добра кондиција. Имајќи ги предвид сите услови и општата криза во светот во 2009 година, успешно и навремено се исплаќаше целата социјална помош пензиите и платите“, изјави министерот за финансии Зоран Ставрески.
Тој додаде дека во минатата година пензиите редовно се исплаќале, за разлика од пред три-четири години, кога пензиите се исплаќаа меѓу 15-от и 20-от ден во месецот.
Ставрески информираше дека буџетските приходи во декември биле исклучително добри, односно најдобри за целата измината година.
Наплатата на буџетските приходи во декември била 99,6 отсто во однос на планот, а во споредба со истиот месец од 2008 година, приходите биле поголеми за близу 28 отсто, информираше Ставрески.
Буџетскиот дефицит во Македонија во 2009 година бил 2,77 отсто од БДП, покажуваат прелиминарните резултати, што претставува втор најнизок буџетски дефицит во Европа.
„Сето тоа создава добра подлога за почетокот на 2010 година, за да можеме со фискална стабилност да влеземе во годината и редовно да ги исплаќаме сите потреби што се подмируваат од буџетот“, изјави Ставрески.
Тој изрази уверување дека и платите на јавната администрација ќе бидат исплатувани до десетиот ден во месецот. /крај/ап/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Пендаровски: Резултатите се јасни, им честитам на победниците
Кандидатот за претседател, Стево Пендаровски на прес-конференција вечерва кажа дека резултатите се јасни и им честита на победниците.
„Резултатите се јасни и немам намера подетално да ги разлагам. Согласно резултатите досега им честитам на победниците, да им посакам успешна работа во следните четири, односно пет години. Мојот концепт за мултиетничка Македонија денеска не доби мнозинска поддршка од граѓаните. Јас сум уверен дека само таква Македонија може да биде просперитетна и демократска држава. Мојата совест е мирна, но не сум сигурен дека совеста им е мирна на оние кои тргнувајќи од тесно партиски и лични политички интереси, денеска ефективно спречија илјадници наши граѓани да го земат второто ливче и да гласаат и на претседателските избори“, рече Пендаровски.
„Мојот личен рејтинг ми даде за право да имам надеж дека можам да бидам рамноправен натпреварувач во оваа трка. Ова што денеска се случи значајно ми ги одзеде шансите да бидам рамноправен натпреварувач. Стотици илјади наши граѓани беа оневозможувани, на систематски, плански, организиран начин да земат второ ливче. Јас сум убеден дека оние 330 илјади гласови од петте кандидати кои отпаднаа од првиот круг се далеку поблиску до мојот политички концепт отколку до концептот кој го заговараше противкандидатката. Направија таква калкулација и на организиран начин ги спречија луѓето да гласаат. Со тие претпоставени гласови трката ќе беше далеку понеизвесна“, додаде Пендаровски.
Тој се заблагодари на сите учесници во изборниот процес и на медиумите за соработката изминатите пет години.
Македонија
ДУИ очекува над 20 пратеници: „Имаме повеќе од 30.000 гласови предност пред опозицијата“
Од 50 отсто изборјано гласачки ливчиња, имаме над 30.000 гласови разлика пред „Вреди“, изјави Шефот на Изборниот штаб на Европскиот фронт, Арбр Адеми.
„Речиси во сите општини сме во предност: Дебар 2:1, Струга повече од 2:1, Кичево 5:1, Врапчиште повеќе од 2:1. ВО предност сме и во Тетово, Гостивар, Куманово, Липково“, изјави Адеми.
Како што рече, се потврдува дека Европскиот фронт ќе стигне до над 20 пратеници.
Според резултатите објавени на страната на ДИК, од досега пребројаните гласови, Европскиот фронт на ДУИ освоил 90.151 или 16,59 отсто, додека Влен има 73.893 гласа или 13,60 проценти.
Македонија
(Видео) Левица: Имаше нерегуларности, бугарски воз, притисоци од сегашната власт и закани за отпуштање по изборите од опозицијата
Партијата Левица вечерва по затворањето на гласачите места обвини за низа нерегуларности за време на гласањето, но и покрај тоа очекува позитивен резултат од изборите. Портпаролот Амар Мециновиќ обвини за ситуации со бугарски воз, попречено гласање, притисоци од сегашната власт но и закани за отпуштања од работа по изборите од сегашната опозиција.
„Денеска видовме дека имаше многу недоследности и неправилности во текот на целиот ден. Лица што требаше да гласаат како болни и изнемоштени вчера не можеа да гласаат. Денеска имаше ситуации на бугарски возови, имаше ситуации во кои имаше изборен материјал до изборните места и имаше ситуации каде што гласањето беше попречено на моменти. Од друга страна во текот на денот забележавме и дека структури блиски до сегашната власт вршеа притисок на наши активисти и на наши истакнати членови, додека, од друга страна, и најголемата опозициска партија го вршеше овој притисок. Дури се одеше до таму да се заканува со отпуштања по изборите“, рече портпаролот Мециновиќ.
Тој потенцираше дека денес пратеници на ВМРО – ДПМНЕ еклатантно лажеле дека Левица повикува на бојкот.
„Левица веќе два дена повикуваше на одѕив. Медиумите блиски на ВМРО-ДПМНЕ констатираа дека Левица не излегла да гласа. Тоа е лага. Ние повикуваме на гласање. Ние сме најголем непријател на оваа власт која сега си заминува. Го поздравуваме одењето на власт и очекуваме позитивен резултат“, нагласи Мециновиќ.
Од нешто повеќе од половина обработени избирачи, според податоците на Државната изборна комисија, Левица добила 31.012 гласови или 6,44 отсто од досега пребројаните гласови.