Американскиот претседател Барак Обама изјави во понеделникот во германски Хановер дека на светот му е потребна посилна и обединета Европа, во периодот кога Европската унија е во криза поради зајакнувањето на европскептичната десница и под заканата за излегување на Велика Британија од Европската унија.

„САД и целиот свет имаат потреба од силна, напредна, демократска и обединета Европа. Обединета Европа претставува потреба за сите нас. Можеби ви е потребен некој однадвор, како мене, да ви укаже на напредокот што сте го оствариле“, изјави во Хановер американскиот претседател Барак Обама во говорот во кој нагласи дека „она што се случува во Европа има последици врз целиот свет“.

Обама го започна последниот ден од престојот во Германија, петти во неговиот осумгодишен претседателки мандат, со посета на индустрискиот велесаем во Хановер, придружуван од германската канцеларка Ангела Меркел, а подоцна двајцата ќе се сретнат со европските челници, францускиот претседател Франсоа Оланд и британскиот и италијанскиот премиер, Дејвид Камерон односно Матео Ренци.

Американскиот претседател рече дека Европа треба да го зазема својот дел од глобалната одговорност за да ја гарантира меѓународната безбедност, и нагласи дека НАТО и европските земји можат да сторат повеќе во борбата против џихадистите од екстремната сунитска организација Исламска држава. Ги повика европските земји, исто така, да ги зголемат вложувањата во воениот сектор и да не подлегнуваат на „самозадоволството“ на тој план.

Во периодот кога некои земји членки на ЕУ најавуваат дека ќе се заложат за укинување на европските санкции против Русија наметната под влијание на САД во врска со украинска криза, Обама порача дека санкциите на Западот против Москва мора да останат на сила „сé додека таа не ги спроведе целосно мировните преговори во Минск“.

„Сакам добри односи со Русија и вложив многу во добрите односи, но мораме да ги задржиме санкциите против Русија сé додека таа целосно не го спроведе договорите од Минск“, рече Обама. Нагласи дека „големината на една земја не се стекнува со злоставувањето на другите, туку со соработка“.

Најави и испраќање дополнителни 250 американски војници во Сирија коишто би требало да ја помогнат борбата против Исламската држава.

„Одобрив испраќање до 250 дополнителни американски војници, особено оние кои им припаѓаат на специјалните сили, во Сирија кои ќе учествуваат во обуката и помошта на локалните сили кои се борат против Исламската држава. Мал број припадници на специјалните американски копнени сили веќе е во Сирија и нивната стручност беше клучна за да им се овозможи на локалните сили да ја потисната Исламската држава од некои клучни зони“, додаде Обама.

Обама повика на повторно воспоставување примирје во Сирија и рече дека за тоа неодамна разговарал со рускиот претседател Владимир Путин. „Разговарав за тоа со Путин на почетокот од минатата седмица за да се обидам да гарантирам повторно да можеме да го воспоставиме примирјето“, рече.

Обама во текот на посетата на саемот во Хановер рече дека тоа е неговата шанса да им порача на луѓето „Купувајте американско“, и додаде дека е горд што може да учествува во презентацијата на „американскиот дух на иновативноста“. /крај/мф/сн

Извор: Reuters/AFP