Суспендираната бразилска претседателска Дилма Русефф, го распушти во четвртокот владиниот кабинет и во својата прва изјава по историското гласање во Сенатот ги повика Бразилците „да се мобилизираат“ против „државниот удар“, како што ја оцени постапката за нејзино отповикување од должноста.

„Апелирам до Бразилците кои му се спротиставуваат на државниот удар, без разлика на тоа од која партија се: мобилизирајте се, бидете обединети и мирни, Борбата за демократијата нема датум на завршување, тоа е борба којашто изискува трајна посветеност“, изјави бразилската претседателка Дилма Русефф.

Горниот дом на бразилскиот парламент во четвртокот со мнозинство изгласа суспендирање на претседателката Русефф во следните 180 дена и со тоа овозможи да ѝ биде судено за наводно прикривање на буџетските кусоци. Резултатот од гласањето беше 55 наспроти 22 и тоа се оценува како болен пораз за Русефф којашто обвинувањата против неа ги нарече парламентарен пуч.

Со одлуката на Сенатот се продлабочи политичката криза во политичката криза во најголемата економија на Латинска Америка, и земја членка на економскиот сојуз на најброзрастечките економии во светот – БРИКС, покрај Русија, Индија, Кина и Јужноафриканската република. Според бразилскиот закон, претседателската должноста истиот момент ја презема потпретседателот Мишел Темер, член на центристичкото Бразилско демократско движење (PMDB).

„Можеби сум грешела, но не сторив никогаш никакво злосторство. Никогаш не можев ниту да замислам дека ќе биде потребно повторно да се бориме против пучевите во оваа земја“, изјави Русефф по напуштањето на претседателската резиденција, алудирајќи на борбата против воената диктатура во Бразил во младоста, поради што била и во затвор.

Русефф тврди дека е жртва на голема неправда и истакнува дека ова е трагичен период за младата бразилска демократија. Порача, исто така, дека ќе се бори и дека никогаш нена да се откаже, но истакна дека на мирен начин и со сите правни средства ќе се бори против нејзиното отповикување. Додаде и дека досега надвладеала многу предизвици, како што се измачувањата во затворите и болестите, и оти сé уште има сили да ги прани своите идеи и права.

Сенатот следните месеци ќе ги испитува наводите против Русефф, по што ќе се одржи уште едно гласање за тоа дали ќе има дефинитивно нејзино отповикување од претседателската должност. За тоа е потребно двотретинско мнозинство во парламентот. Коментаторите сметаат дека малку е веројатно дека Русефф ќе го преживее судењето, пишува AFP.

Русефф во меѓувреме ја распушти владата, меѓу кои отстранетите шефот на клучните министри, вклучително и министерот за финансии Нелсон Брабоса. Суспендиран, исто така, и шефот на претседателската администрација Жак Вагнер, пишува The Wall Street Journal.

Со нејзиното засега привремено отповикување се завршува 13 години континуирано владеење на левичарската Работничка партија (PT) чијашто популарност сé повеќе паѓа поради лошата економската состојба и големиот корупциски скандал во кој е вклучена државната нафтена компанија „Petrobras“.

Бразил од пред неколку години беше најбрзорастечка јужноамериканска економија, а сега е во најголемата рецесија во повеќе од една деценија, а околу 11 милиони Бразилци не можат да најдат работа./крај/мф/сн

Извор: Макфакс