Рускиот претседател Владимир Путин и американскиот државен секретар Џон Кери, не разговарале за воената соработка против џихадистите во Сирија, во текот на состанокот во четвртокот ноќта во Кремљ, соопшти во петокот портпаролот на рускиот претседатели, Дмитриј Песков.

„Беа разгледувани различни формати, но темата на непосредна соработка и заедничко дејствување на воените структури на планот на борбата против тероризмот (во Сирија) не беше тема на разговорите“, изјави Песков за новинарите.

Според портпаролот на Кремљ, размената на информации во оваа сфера „се одвива, но сепак, за жал, не се приближивме реално до вистинска соработка со цел да се зголеми ефикасноста на борбата против тероризмот во Сирија“.

„Беше продолжена комуникацијата, која е доста конструктивна, доста отворена и детализирана“, изјави Песков истакнувајќи дека разговорите меѓу Путин и Кери завршиле „многу по полноќ“, а започнаа во 22 часот по московско време.

Притоа Песков констатираше дека по средбата „и натаму остануваат многу прашања во врска со реалната вистинската соработка во рамките на исполнувањето на операциите во Сирија“.

Кери во Москва, во својата втора посета оваа година или четврта од 2015-та, пристигна во четвртокот вечерта и веднаш се сретна со Путин и со рускиот колега Сергеј Лавров, со кој подоцна во петокот ќе има засебни разговори.

Според извештаите кои ги објавија во четвртокот американските медиуми Кери во Москва, и покрај несогласувањето на многу американски функционери требало да ги претстави планот во кој се предлага споделување на разузнавачките податоци за да се идентификуваат локациите на водствата, камповите за обука, линиите за снабдување и седиштата на Џебхат ан-Нусра, огранокот на Ал Каеда во Сирија. Воздушните напади на тие цели може да ги извршуваат американки или руски авиони, се наведува во извештајот.

Проширената координација меѓу Русија и САД, според овие извештаи, би требала да биде канализирана преку Групата за заедничка имплементација чиешто седиште ќе биде во близина на јорданската престолнина Аман, Двете држави би формирале одвоени штабови за операциите, како и заедничко координационо биро во кое ќе ги претставуваат високи команданти, разузнавачи и стручњаци за воздушни напади.

Високи американски функционери изјавија дека Кери ќе разговара за начините на борбата против Исламската држава и Ал Каеда во Сирија, како и за борбата против насилствата, ослободувањето на трасите за хуманитарна помош, и за политичката транзиција во земјата.

Москва минатата седмица неколкупати потсети дека едно од главните несогласувања со Вашингтон е неговото одбивање да се дејствува врз групата Џебхат ан-Нусра, која е ставена на листата терористички организации на ОН. Имено некои од групациите во Сирија кои како „умерени“ ги поддржуваат САД, тесно соработуваат на теренот со сириската Ал Каеда.

Позициите за иднината на Асад

„Кога станува збор за судбината (на сирискиот претседател Баша ал-) Асад, добро познатата позиција на Русија не е променета“, истакна портпаролот на Кремљ. Тоа значи дека Москва и натаму е со ставот дека сирискиот претседател треба да биде вклучен во транзицијата на земјата, и оти за неговата политичка иднина треба да решаваат единствено Сиријците на непосредни избори.

Песков додаде дека Русија продолжува со заложбите за продолжување на преговорите за решавање на сириската криза. Според него, само преку продолжување на процесот на меѓусириските индиректни преговори во Сирија по покровителство на ОН може да се дојде до политичко решавање на ова прашање.

Покрај тоа, Песков негативно одговори на прашањето дали Кери на средбата со Путин го покренал прашањето за продолжува на Договорот за намалување на стратешкото вооружување.

Песков, исто така, одби да даде оцена дали е остварен напредок во разговорите меѓу Русија и САД. „Го кажав сето она што го имав за оваа тема“, истакна додавајќи дека главните оцени ќе ги дадат Лавров и Кери./крај/мф/сн

Извор: Макфакс