Се додека говорот на омраза не прерасне во насилство, никој тоа не го санкционира, тој се изедначува со слободата на изразување бидејќи за нив во реалноста нема дефинирано јасна граница, беше заклучокот на дебатата „Кибер-просторот, промотор на слободата на изразувањето или говорот на омразата“.

Марјан Забрчанец, извршниот директор на МОФ, рече дека говорот на омразата на интернет е нешто кое не може редовно да се контролира, ниту пак, да се ограничи.

„На интернет секој може да го искаже своето мислење, а притоа и да го сокрие својот идентитет. Точно е дека пропагандата против слободата на говорот и нејзината злоупотреба секогаш ќе постои и тоа никој не може да го спречи. Интернетот е огледало на општеството во кое живееме. Често се случува злоупотреба, на пример на фан страната на Васко Ефтов има дефинирано правила на однесување, но ни самиот тој не ги почитува. Таму пишува дека нема да се толерираат навреди, нарушување на нечие реноме, достоинство, а тој го прави тоа со својот статус каде ги омаловажува кандидатите за претседатели на ЗНМ, само затоа што се Албанци“, рече Забрчанец.

Сеад Џигад, рече дека слободата на говорот е до онаа граница каде почнува да се нарушува достоинството, угледот и реномето на соговорникот или на одредена малцинска група. Тој додаде дека говорот на омразата е секогаш во борба со толеранцијата, но дека за него нема место за толеранција.

„Говорот на омраза се развива во неколку степени. Започнува со исмевање, а потоа следат и останатите фази како омаловажување, навреда, етикетирање, дискриминирање, дехуманизација и сатанизација, за на крај да се дојде до последната фаза, а тоа е физичкото насилство“, рече Џигад.

Тој додаде дека луѓето денеска интернетот го користат како издувен вентил да го искажат своето мислење преку говорот на омразата.

Роберто Беличанец, пак, рече дека технологијата е неутрална и дека ние самите додавајќи ги своите мани, доблести и фрустрации го креираме говорот на омразата, но додаде дека за говорот на омразата виновни се и традиционалните медиуми кои на благ начин го користат, а потоа неговата посилна примена продолжува на интернет.

„Традиционалните медиуми го водат орото на говорот на омраза и ги создаваат стереотипите. Потоа населението само се мобилизира, преку групи на Фејсбук, Твитер, Блогови и го зајакнуваат тој говор на омраза. Овој говор е насилство и на него се одговара со иста мерка. Случаи каде говорот на омраза прерасна во насилство се тепачката на плоштадот за изградба на црква, како и онаа на комитите во Нерези. Говорот на омраза е гној кој е подобро да излезе во сајбер просторот, отколку како крв по улиците“, рече Беличанец. /крај/бс