Градењето на спомениците на Александар Македонски, поддршката од страна на македонската влада на здружението на децата бегалци од Егејска Македонија, пишувањето во македонските учебници дека одлуката на самитот во Букурешт за Македонија била неправедна

Градењето на спомениците на Александар Македонски, поддршката од страна на македонската влада на здружението на децата бегалци од Егејска Македонија, пишувањето во македонските учебници дека одлуката на самитот во Букурешт за Македонија била неправедна, именувањето на аеродромот „Александар Велики“, именувањето на стадионот „Филип Втори“, Македонската енциклопедија.

Марија Телалиан, правен советник во МНР на Грција сите овие аргументи ги наведе против Македонија пред судот во Хаг, велејќи со ова дека Македонија ја прекршила Времената спогодба, односно членот шест и седум.

Со ова, според неа, Македонија го покажала нејзиниот иредентизам и не презела никакви мерки за да оствари добрососедски односи.

Во својот настап пред Меѓународниот суд за правдата, Талелиан истакна дека грчката Канцеларија за врски во Скопје многу пати била оштетена и дека Македонија не презела никакви чекори и не одговорила на ниедна протестна нота на Грција.

Исто така, за прекршување на Времената спогодба Грција го истакна градењето на спомениците на Александар Македонски во Прилеп и Штип.

„Подносителот не ги спори овие факти, наместо тоа поднесува аргументи дека имињата и статуите на најважните историски личности од елинизмот не се опфатени со третиот став од членот седум“ рече Талелиан.

Професорот по меѓународно право Алан Пеле во своето излагање рече дека во овој спор треба да се примени меѓународното начело за урамнотеженост.

„Се работи за многу важно начело кое воспоставува рамнотежа меѓу две страни во еден реципрочен однос. Ако една страна ги исполнува своите обврски, не смее да си дозволи да го искористи неисполнувањето на обврските на другата страна, тоа е максимата на урамнотеженост“ рече Пеле.

Со ова заврши првиот дел од излагањето на Грција во врска со тужбата што ја поднесе Македонија против Грција пред Меѓународниот суд.

Целта на тужбеното барање е судот да утврди дека Грција на самитот на НАТО во Букурешт во 2008-ма година го прекршила членот 11 од привремената спогодба од 1995 година, односно дека приговорила на членството на земјата во Алијансата под привремената референца „Поранешна Југословенска Република Македонија“.

Од судот, исто така, се бара на Грција да и наложи понатаму да не ја прекршува спогодбата.

Вториот круг од усната расправа ќе се одржи следната недела.  Се очекува конечната пресуда судот да ја донесе најдоцна наесен./крај/фф