Усогласување на монетарната и фискалната политика, намалување на задолжувањето на државата со благајнички записи на нула до март, намалување на каматата ако се издадат нови записи, се дел од барањата на бизнис секторот до Владата искажани на денешниот заеднички традиционален појадок

Усогласување на монетарната и фискалната политика, намалување на задолжувањето на државата со благајнички записи на нула до март, намалување на каматата ако се издадат нови записи, се дел од барањата на бизнис секторот до Владата искажани на денешниот заеднички традиционален појадок

„Владата да остане на досегашниот курс во реформите и во оваа година побаравме континуитет и отвореност во дијалогот, за да може сите мерки коишто се носат да не бидат интервентни, односно антикризни, бидејќи оваа година ја гледаме како година на стабилизација“, рече Златко Калеников, претседател на Сојузот на стопански комори, по денешниот појадок со премиерот Никола Груевски и дел од министрите во Владата.

Според него,континуитетот во дијалогот ќе доведат до мерки кои се поконструктивни во насока на спроведливост и помош на реалниот сектор.

Од бизнис секторот побараа запирање на задолжувањата на државата до март, а доколку продолжи издавање на благајнички записи да не бидат со камата поголема од 5 отсто. Истото, да го прифати и Народна банка и нејзината камата да не биде поголема од 6 отсто.

„Ние постепено ќе почнеме да го намалуваме позајмувањето и ќе се обидеме да ја намалиме каматната стапка. Зборувам за Владата. Се надевам дека тоа ќе го направи и Централната Банка. Каматната стапка ќе се обидеме да почнеме да ја намалуваме во првиот квартал“, рече премиерот Груевски.

Од Сојузот бараат и нова законска рамка за регулирање на критериумите за каматите за постоечки договори за кредитирање и основот по кој би се менувале.

Бизнисмените бараат создавање конкуренција со привлекување странски банки, како Рајфајзен, Ерсте, Интеса и слично.

Тие побараа и интервенции во делот на урбанизмот, итна промена на дел од Законот за просторно и урбанистичко планирање со што би се затворил еден круг на олеснување на постапката за инвестирање од финансиски и урбанистички аспект.

„Ние сакаме да креираме мерки коишто ќе бидат компатибилни со потребите на приватниот сектор. Тоа е дел од нашето стратешко работење и ветување во нашата програма“, рече Груевски.

Тој најави кон крајот на месецов или на почетокот на февруари, четвртиот пакет антикризни мерки изработени по дискусиите на Владата и бизнис секторот, кој ќе биде многу мал, затоа што со претходните три главните работи биле направени. /крај/бб/ап/

Фото:Филип Поповски/Макфакс